Daily Newspaper

Hrilengin Krismas bazar a nghawng

13

Hrilengin kawng hrang hrangin Mizoram a nghawng a, Mizote hun nghahhlelh Krismas pawh kum dang a ni thei lo; Krismas bazar pawh a nghawng mek a, kumin chu a lun dawn lo tih a chiang e.

MIMA (Mizoram Merchants Association) treasurer RMS Dawngkimi chuan sumdawngte’n hrileng an tuar tih a sawi a, kuminah inhralh a har thu leh, Krismas dawnah pawh inhralh a har thu te sawiin, thawmhnaw zuarte an inhralh chhe zual tih a sawi.

Kum dangah chuan Krismas bazar-ah hian ni khatah cheng nuai khat man te an hralh a, kuminah chuan cheng sing khat man te an hralh chuan an inhralh that tum a nih thu a sawi.

Dawrkai thenkhat, entirnan ran chaw zuarte chu an inhralh reng tho mai thei tih a sawi a, ni tin mamawh thil zuarte pawh an inhralh reng tho a, mahse anni pawh kum dang ai chuan an inhralh tha lo zawk tih a sawi.

Dawrkai thenkhat chuan an dawr an titawp tih an hriat thu te a sawi a, inhawng mumal lo chunga dawr luah, a hauh nana luah te an awm a, inhralh a har bakah dawr titawp hial an awm thu a sawi a ni.

Mizoram sumdawnna hmun lar Millennium Centre pawh kum dang ang lo takin a reh a, kum dangah chuan tun ang hunah chuan an innek nulh nulh thin kha a ni a, kumin erawh a thawl hle.
Millennium Centre Dawrkai Association general secretary H Lalnunsiama chuan: “Kum hmasate nena khaikhin chi a ni lo. Kum danga kan inhralh chanve pawh kan pha lo hle a ni,” a ti a, dawrkai thenkhat chuan kum danga an hralh zat atanga chhuta 20% vel chauh te an hralh thu a sawi bawk.

Khaw dang atangin Aizawlah mi an zin loh bakah Aizawla awm sate pawh kum dang angin an bazar lo tih a sawi a, December-ah chuan dawrkai te’n nula pathumte an ruai thin a, kumin erawh inrawih belh pawh a ngai lo tih a sawi bawk.

Mizorama bazar upa ber New Market chu kuminah thiatin, sak that tura tih a ni a, hei vang hian a inzawrh theih loh. Zion Street leh sumdawnna hmun lian dangte pawhin mihring an tlem thu leh December-ah inhralh a awl sawt lem loh thu an sawi.

Sumdawngte chuan bungrua chu an nei tho tih an sawi a, bungraw la turin anmahni kal thei lo mah se a chah theih avangin zawrh tur chu a awm tih an sawi. Phai atangin an chah thei tho a, China atang pawhin an chah bawk.

Mizoramah chuan December chawlhkar hnihna vel atang hian bazar a lun thin a, mi tam takin Krismas bazar hi mamawh lei nan leh hunpui a nih avangin mamawh lem loh pawh intihhlim nan an lei thin. Kumin erawh mipui an bazar luih luih lo a, Krismas bazar pawh a awm hlei thei rih lo a ni e.

Read More>> Full>> Epaper Subscribe Now

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy