Daily Newspaper

Hripui karah Tokyo Games an tan ta…

10

Kumkhata sawn tlai Tokyo 2020 Olympics chu Zirtawpni zan hi opening ceremony hun ni chauh mah se kum dang ang bawkin hawnna hunpui hmain infiamna thenkhat khelh tan a ni a, Nilaini khan hripui vanga dodalna lian tak kal reng karah hri hlauhna nen inelna an tan ta.

Intihsiak hawnna game-ah a thlengtu Japan women’s softball team chuan hnehnain bul an tan a; gold medal la tura rinkai Japan nulate leh Australia-in softball match hmanga Games inelna an tan lai hi a hmunah Olympic staff 100 bawr velin an thlir a, mercy rule an tih dan hmangin innings nga an khelh hnuah Japan an chak.

He game hi chhun pachan laia khelh a nih avangin ni a sain, boruak a lum uap pik churh a, boruak lum zawng hi 30 degrees Celsius (86 Fahrenheit) niin, an khelhna hmun hi Fukushima a ni a, Chernobyl hmuna nuclear putchhuak vanga an hmun rauhsan zinga pakhat niin, kum 2011 khan lirnghing leh tsunami avangin chhiatna rapthlak an tuar a, chu hmunah ngei chuan Olympic Games inelna hmasaber an tan ta a ni.

Nilaini khan softball game hnih dang bakah hmeichhe football match ruk khelh a ni bawk.

Kumin Olympic behbawmah hian Games buaipuitu hrang hrang bakah inelna hmachhawn tura Tokyo thlawklut zingah hrikai engngemawzat hmuhchhuah an ni a, chuti chungin infiammi, staff leh media mi belhkhawm 11,000 chuangte chuan Japan ramah Olympic an tan chho ta tho a ni.

Games thlengtu Tokyo-ah hian hripui a hran thar leh avangin khuahkhirhna khauh taka kalpui mek niin, intihsiak zawng zawng deuh thaw hi a hmunah mipuiin an chhim hlei thei dawn lo a, Games buaipuitu leh sawm bik mi tlemte chauhin an thlir thei dawn a ni.

Japan ramah hian a mi cheng zaa 34 vel chauhin vaccine dose khatna an la a, hei hi an dinhmun a nih avangin an rama nghah Olympics hi hri taidarhtu lian (super-spreader event) a nih an hlau hle a, an ram mipui tam zawk hian Games thlen loh an duh.

Tunhnaia Asahi newspaper-in mipui ngaihdan a lakkhawmah zawhna chhangtu 68% chuan hripui inkaidarh tur ven kawngah Olympic organiser-te an hlawhtlin zawh an ring lo a, an ram khawpuia Games nghah tumna nemngheh tawh chu kaltlangpui loh ni se tiin an ngaihdan an tarlang nghal.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy