Hriselna atan kea kal tam thatzia zirtir
Health & Family Welfare department-a Mizoram Health Systems Strengthening Project (MHSSP) hmalakna in Zirtawpni zing khan Aizawlah hriselna atana kea kal runpui – Walk for Health Walkathon 2025 neih a ni. Natna inkaichhawn theih loh (non communicable diseases) hrang dona atana buatsaih a ni.
Lammual pankhawm turin hmun sarih – Ramhlun South, Chaltlang Dawrkawn, Chanmari Traffic Point, Sikulpuikawn, Khatla Kawn, Chhinga Veng leh Dinthar NHM office kawt atangin school leh college zirlai, thalai pawl bakah Health department thawktute an chhuak a ni.
Lammuala hian Health minister Lalrinpuii chuan, natna inkaichhawn theih loh natna benvawn a pung chho tial tial a, heng natna laka fihlim a, a vei tawhte pawh an inenkawlna atana pawimawh chu taksa sawizawi a ni tih a sawi. Kea kal chu mihring taksa sawizawina harsa lo leh hlawkthlak, hriselna atana pawimawh a ni, tiin, “Reilote pawh nise nitin kea kal hian nunna a pawtsei thei a ni,” a ti.
Health department atanga thusawitute chuan NCD hi kum upa natna anga ngaih thin ni mah se, tunah chuan thalai zawkah vei an tam bakah NCD hrang hrang avanga thih phah an tam ta hle a. Natna neiha inenkawl mai nachang hriat a pawimawh tih an sawi.
February 15 atang khan district heng hrangah walkathon hi neih a ni a. Khaw 509 atangin mi 70000 vel an tel a ni. Aizawla walkathon neihah hian MLA Lalmuanpuia Punte leh Dr K Beichhua te pawh an tel a ni.
Hriselna atan kea kal tam thatzia zirtir
