Khuh, hritlang leh luak pawh telin India ram hmun hran hran a tuam mek laiin Indian Medical Associaton (IMA) chuan hritlang tihdam nana uchuak taka antibiotics heng Azithromycin leh Amoxiclav te ei a ngai lo tiin thuchhuah a siam.
IMA chuan India rama hun inthlak azira khuh leh hritlang leng mekin a thlen luakchhuak, hrawkna, khawsik, taksa kham rem rum leh kawthalote chu H3N2 influenza virus in a thlen a ni a ti a. Heng avanga khawsik hian ni thum te a daih tia sawiin khuh erawh kar thum thleng daih pawh a nih theih thu sawiin hritlang kai an tam chhan chu air pollution-in a tihpunlun a ni an ti bawk a.
Indian Council of Medical Research (ICMR) scientists te pawhin Influenza A subtype H3N2 chu heng khuh te thlentu ber niin a thenah khawsik a keng tel an ti bawk a, tun hnai thla hnih chhungin India ram hmun hrang hrangah a leng an ti bawk a. H3N2 substype te hian variant dang aiin damdawi in panna a thlen tam zawk an ti bawk a.
Hunpui inthlak mila hritlang heng seasonal colds tia sawiah te hian antibiotics-in awmzia a nei lo an ti bawk a, antibiotics ei uar lutuk chuan antibiotics resistance siamin chu chuan mipui nawlpui tan bacterial infection hlauhawm zawk a thlen thei an ti bawk a. Physicians te chuan antibiotics chawh mai an uar hle chu a pawi thu IMA te chuan an tarlang bawk.
“Mi thenkhat ten antibiotics heng Azithromycin leh Amoxiclav etc te ngaihsam taka eiin an dinhmun that hnuah an ei zui lo mai bawk a. Hei hi chin chhunzawm chi a ni lo va, a chhan chu antibiotic resistance a thlen thei a ni. Antibiotics mamawh hun a thlen tak tak hunah antibiotics resistance avangin hman tlak lohin a awm mai ang,” tiin IMA te chuan an sawi a.
“Antibiotics chawh a nih hmain infection chu bacterial a nih leh nih loh hriatchian phawt a ngai a ni,” tiin IMA thuchhuah chuan a tarlang bawk a. Covid-19 len nasat lai pawhin Azithromycn leh ivermectin te chu uar taka hman a nih thu sawiin chung antibiotics te chu a tha ngei tih finfiahna a awm reng reng lo an ti bawk a.
Pandemic len nasat laiin India ramah nasa takin antibiotics hralhchhuah a ni a, hritlang leh khuh enkawl nan bera hman a ni tiin kum 2021 a Washington University School of Medicine, St. Louis tena zirchianna an neihah tarlan a ni.
“Antibiotics resistance hi global public health tana thil pawi thei bera ngaih mek a ni,” tiin study’s senior author, infectious specialist Sumanth Gandra, MD, associate professor of medicine leh associate hospital epidemiologist, Barnes-Jewish Hospital chuan a sawi a. “Antibotics hman uar lutuk chuan minor injurity leh common infection heng pneumonia te ang te tidam thei lovin nunna channa hial a thlen zui thei zawk a. Bacteria te antibiotics ngam tawh te chu tihhlum ngaihna awm tawh lo,” tiin a sawi bawk.
Kum 2019-a zirchianna chuan antimicrobial resistance (AMR) avanga nunna chu kum 2050 vel atang chuan kum tin maktaduai 10 an awm tawh dawnin a sawi lawk a ni.
India hi antibiotics hmang nasa ber ram zingah telin health practitioner leh activists ten an chawh uar hle a. Antibiotics consumption lamah India chu a chungnung ber niin antimicrobial resistance (AMR) pawh a sanna ber a ni bawk.
Tun hnaia India ramah hritlang leng nasa ber ber te chu Influenza A H3N2 thlen a nih thu ICMR te chuan an sawi a. “December 15 atanga surveillance data kan neih hmangin Influenza A H3N2 chu leng nasa ber a ni,” tiin ICMR te chuan an sawi a.
ICMR te hian respiratory virus curveillance bikah Viral Research and Diagnostic Laboratories (VRDL) 30 neiin state hrang hranga medical college ah te bun a ni a, severe acute respiratory infections (SARI) veite atangin sample lak thin a ni a. ICMR te chuan SARI atanga damdawi In luhpui ngai zahve zet chuan Influenza A H3N2 an kai tiin an sawi.
Viral flu a nih avangin antibiotics in awmzia a nei lo an ti bawk a. ICMR te chuan damlote chu antibiotics ei lo tur leh doctor te rawn lo chuan damdawi dang pawh ei lo turin an ngen bawk a. “Hritlang kan kai a nih chuan khawsik leh taksa kham them thum tihziaawm nan paracetamol ei chu a pawi lo va, a tam thei ang ber tuiril lam in tum tur,” tiin ICMR chuan a tarlang bawk a, a theih chuan pawna chhuahin hmaituamna vuah chu a tha an ti bawk.
Hritlang satliahah antibiotics ei loh tur : ICMR
![](https://theaizawlpost.org/wp-content/uploads/2023/03/icmr.jpg)