Ram hruaitu corrupt kan neih chhung chuan ramin hma a sawn thei dawn lo tih ZPM leader Lalduhoma chuan a sawi.
Ningania Palak biala Tuipang (Tipa) leh Zawngling (Zyhno) khuaa vantlang inkhawmah ZPM leader chuan, kan ram rorelnaa Pathian ram a lo thlenna tura daltu lian ber pakhat chu eirukna a ni, tiin, hruaitu corrupt kan neih chuan engti kawng mahin hmasawnna a awm thei dawn lo tih a sawi.
“Ram hruaitu politician inti thenkhat, term khat an ni dek dek a, in leh lo tha tak tak an din a, an hausakna a let hnih let thumin a pung thur thur a, an eiru lai hi hmuh kher a ngai lo, an khawsak dan hian an eiru tih hi a tichiang em em a ni. ZPM chuan Val Upa Council kan nei a, an ni hi eirukna do tura mi tangkai an ni dawn. Eirute an zilh anga, party chhungah na takin action an la thin dawn,” a ti.
Mizorama eirukna a hluar chhan chu chief minister-in department tha tha, sum tamna apiang an chan zel vang niin Lalduhoma hian a sawi a. ZPM chief minister chuan works department a chang ve dawn loa, minister ho a enkawl anga, chak lo deuh a dawm anga, VUC nen hauh ngai an hau dawn tih a sawi. “Eirute hremna tur bera duan Lok Ayukta hi an indaih lo em em a, mi chhui turin an chak tawk lo. Pathian zara kan sawrkar chuan Lok Ayukta thuamthat hi hna hmasaah kan nei dawn. CBI kan ko lut bawk dawn,” a ti.
India ram pumah hnam tenau leh Kristian leh sakhaw te zawkte kan him theihna turin central inthlan awm turah BJP leh a sangawi zawnpuite hneh phawt a ngai tih ZPM hruaitu hian a sawi. Mizoramah tualto party inti siin MNF chu central-ah BJP nen thawk hoin Parliament-ah pawh an thu tlang tih sawiin, “Kan rama eng inthlanah pawh, VC, LC, District Council, MLA inthlan a ni emaw MNF kan vote hian kan sakhua ticheptu BJP kan tanpui a, an tha kan tichak tihna a ni. Kan ram rorelnaah Pathian ram thlenna atana hnawk ber chu NDA hi a ni a, political party kan nihna atang chauha thlir loin, Kristian kan nihna atang hian eng pawl hi nge kan awmna tur leh kan awm lohna tur tih kan ngaihtuah a hun tawh a ni,” a ti.
Hruaitu corrupt neih chuan hma kan sawn thei dawn lo – ZPM leader
Get real time updates directly on you device, subscribe now.
Prev Post