‘Hrui khat vuanin’ tih thupui hmangin Zofest hmang

December ni 4-6 chhung khan MZP buatsaihin West Phailengah ‘Hrui khat vuanin’ tih thupui hmangin Zofest an hmang.
Lalmuanpuia Punte, Adviser to CM (Political) chuan, “hrui khat vuanin” tih thupui sawiin, “Zofaten kil hrang hrang atangin beih kan tawk nasa hle a, hetiang hi kan dinhmun a ni chung pawha kan inlungrual hlei thei lo hi chu a hahthlak hle a. Hrui khat kan vuana, kan tanrual vat lo a nih chuan kan darh vat ang,” a ti.
Zofest-ah hian Mizoram chhung leh Mizoram state pawn hmun hrang hrang atangin Zo hnahthlak chi peng hrang hrang an kalkhawm a, Zo hnahthlak chi peng hrang hrangte insuihkhawm chungchang sawiin an ngaithla a ni.
Mizorama tlawmngai pawl hruaitute’n thu an sawi a, sorkar hruaitute’n thu an sawi bakah Zo hnahthlak chi peng hrang hranga an hruaitute’n thu an sawi bawk.
December ni 5 khan Manipur-a Zo hnahthlak mi 12, Zo hnahthlakte leh Meitei inbeih vanga an buainaa nunna chante vui liam an ni a, Zofest-ah pawh hemi ni hian anmahani sunna hun hmangin, kalkhawmte minute khat chhung ngawi rengin an ding a ni.
December ni 5-ah khan ‘Pum Titi’ tia vuahin kalkhawmte tan thupui sawi hona hun an siam a, “India, Burma, Bangladesh leh ram hrang hranga Zofa awmte hi thisena unau, thlah khat kan ni a. Ramriin min thendarh mah se hnam nunphung inang, ze inang, rinna thuhmun kan ni,” an ti. “Vawiinah hian ramriin min thendarh rih mah se engtik niah emaw chuan ram rorelna pakhat hnuaiah kan la awmkhawm ang tih kan ring tlat a ni,” an ti bawk.