Pathianni khan BWF Malaysia Masters khelh zawh a ni a, mipa final hmuhnawm takah HS Prannoy chuan a khingpui Weng Hong Yang a hneh a. Indian shuttler Prannoy hian a vawi khat nan World Tour title a hlawhchhuahk.
Final hmuhnawm takah final lut tura zin kawng hautak zet mai paltlang HS Prannoy-a’n bul a tan tha a, champion tura rinkai Weng HY lakah 21-19 a chungnungin set khatna a la. Indian shuttler Prannoy hian bul tan tha viau mah se set hnihnaah a khingpui Weng HY a khan lo ta viau thung a, 13-21 a set hlohin, 1-1 a ni chiah a, deciding set khelh a ngai.
Champion tur zawk tihchianna set pawimawh takah Prannoy-a’n bul a tan tha lova, point thum laia hnufual zawk changte a nei hman hial. Hnufual zawkah tang reng mah se huai sen taka a khingpui bei letin Weng HY hi a lehthal ta hial. A khingpui lehpel a, point thuma a san fak hnuin point 18-ah a ding reng a, a khingpui hian a rawn nihrual ve leh ta hial. Point 18 ve ve an hmuh hnuin Prannoy a khel tha ta tlat thung a, point thum hmu zawnin hnehna lian a sualchhuak a, point 21-19, 13-21 leh 21-18 a hnehna changin BWF Malaysia Masters champion thar a ni ta a ni.
Inelna lian Malaysia Masters-ah champion turin Prannoy hian zin kawng hautak tak a zawh a, harsa taka player tha tak tak Chou Tien Chou, Li Shi Feng leh Kenta Nishimoto te a paltlang hnuin semi-final-ah a khingpui Christian Adinata a inhliam vangin awlsam takin a chak a. Final hautak takah Weng Hong Yang a paltlang leh hram a, ropui takin a champion.
BWF Malaysia Masters-ah hian hmeichhe lama India chhuanvawr PV Shindu chuan final a lut zo lo va, semi-final-a a khingpui Gregoria Mariska Tunjung lakah 21-14 leh 21-17 in a tlawm.
HS Prannoy a champion
