Mizoram Board of School Education (MBSE) chuan Ningani khan High School Leaving Certificate (HSLC) Result 2026 a tichhuak a. Pawl leh political party lamin pass-te lawmpuina leh hlawhtling ve ta lo te fuihna thuchhuah an siam.
Central YMA thuchhuak chuan, MBSE chungah lawmthu a sawi a. HSLC result chhuakah zirlai 14663 (80.31%) in hlawhtlinna an chang chu lawmawm tiin, zirlai pass zawng zawng an lawmpui a. Ram leh hnam rilru pu chunga zir chhunzawm turin duhsakna a hlan tih a sawi a ni.
Tun tuma hlawhtling ve ta rih lote chu hnual mai loa theihtawp chhuah zel turin a ngen tih a sawi a. 2025 result aia 3.63% a zirlai pass an tam zawk chu hmasawnna lawmawm tak a ni tih sawiin, hetiang a thlen theihna tura thahnemngai taka thawktu zirtirtu leh thawktu zawng zawng chungah an lawm a, kan ram zirna in hma a sawn zelna tura theihtawp chhuah zel turin an ngen tih a sawi bawk.
Mizo Zirlai Pawl chuan MBSE-in hun reilote chhunga result an peihfel thei leh result felfai tak an tichhuak chu fakawm tiin an thawhrimnaah lawmthu a sawi a. Nikum aia pass an tam chu hmasawnna nasa takah a ngai tih a sawi a ni.
Hlawhtlinna chang zawng zawngte an lawmpui bakah compartmental chance nei zirlai 117 pawh nasa zawka inbuatsaih turin a ngen tih a sawi a. Chutih laiin hlawhtlinna chang zo ve ta lo zirlai 3477 a tawrhpui takzet a. A lehpekah hlawhtlinna chang tura bei sauh sauh turin a fuih tih a sawi a ni.
MZP chuan kum 1995 atanga kum tin a lo tih thin angin, HSLC top-10 a Mizo tlingte a chhuan zia leh duhsakna lantirna atan leh Mizo zirlaite inkarah inelna thianghlim a awm theihnan April 28 hian Vanapa Hall-ah HSLC top-10 a Mizo tlingte chawimawina hun a buatsaih leh dawn tih a sawi bawk.
Mizo Students’ Union pawhin hlawhtlinna changte an lawmpui a, hlawhtlinna chang zo ta lo erawh pawi a tihpuiin beidawng loa theihtawp chhuah zel turin duhsakna a hlan tih a sawi a ni.
School 146-in 100% pass percentage an nei chu lawmawm a ti a. School 13-in 100% fail percentage an nei erawh pawi a tiin, zirlai zawng zawng fail-na school hi tan la zual a, an school-in hlawhtlinna an chan ngei theihnan thawktute leh zirlaiten inpekna nasa zawk nei thar turin a ngen tih a sawi bawk.
‘Mi zawng zawng hmuh theiha ranking leh result bua division tarlan a ni ta lo hian hun lo awm turah rah tha zawk a chhuah ngei kan beisei a. Mark hmuhsana inelna aia quality education, mihring puitling leh hmantlaka inchherchhuahna lam a hrinchhuah ngei kan beisei,’ MSU hian a ti.
ZPM Thalai Hqrs. chuan, zirlai hlawhtlingten rim taka an lehkha zirna rah tha tak an seng chu phu an ti hle tih a sawi a. Zirlai hlawhtling ta lo leh compartmental chance neite pawh beidawg loa an zirlai tha taka zir chhunzawm zel turin an chah tih a sawi.
HSLC result chhuakah pass-te lawmpui
