MBSE hnuaia HSLC exam results 2023 chu tihchhuah a lo ni leh ta a. Kuminah hian nikum aiin pass percentage a sang zawk hret a; nikumah 70.64% niin, kuminah 71.14% a ni a, a sanna hi 0.5% a ni.
Kumin pass percentage hi sang zawk mah se, a quality erawh nikum aiin a hniam ve thung. Kuminah hian distinction leh first division-a pass-te hi 10.11% leh 27% a nih laiin, nikumah khan distinction leh first division-a pass-te kha 11.67% leh 30.2% a ni a. Second leh third division-ah erawh kuminah hian a sang ve ve thung.
Nikum khan 100% passed school 98 a awm a, sawrkar school 11 leh private school 87 a ni a. Kuminah hian 100% passed hi school 107 awmin sawrkar school 16 leh private school 91 a ni. Sawrkar school-in hma an sawn hret hret.
Nikum khan 100% failed school 15 a awm a, sawrkar school 3 leh private school 12 a ni a. Kuminah hian 100% failed school hi 14 awmin sawrkar school 1 leh private school 13 a ni a, sawrkar school-in hma an sawn leh hret a, private school lam an tlahniam leh hret thung. Nikum leh kumina a zawna failed vek school pali an awm bawk.
School management-wise atanga tehin, nikum aiin kuminah sawrkar school bik result a hniam zawk hret. Nikum khan sawrkar school bik result chu 58.12% a nih laiin kuminah chuan 57.71% a ni a, nikum aia a hniamna hi 0.41% a ni. Deficit school leh Aidded school ten hma an sawn nasa a. Nikuma Deficit school pass percentage chu 88.39% a nih laiin kuminah chuan 92.18% a ni a; Aidded school pawh nikumah 62.79% a nih laiin kuminah chuan 69.26% a ni. Lumpsum school kuminah a tlahniam; nikum khan 68.18% a nih laiin kuminah chuan 65.32% a ni.
Private school-in hma an sawn hret hret zel a, nikumah pass percentage 79.79% a nih laiin kuminah chuan 83.5% a ni ta.
Nikum khan top ten (merit list)-ah 17 an awm a, kuminah pawh 17 an awm leh a; nikum leh kuminah sawrkar school atangin merit list-a inhlangkai thei an awm lo.
HSLC result hian a kum telin hma a sawn chho hret hret a, a quality pawh a tha chho hret hret a tih theih awm e. Hetih lai hian, pass percentage ringawt hi zirna quality teh nana hman ber tur erawh a ni lo. Zirlaiten thiamna tak tak an neih theihna tura zirtirna an dawn hi thil pawimawh ber a ni.
HSLC results khaikhinna
![](https://theaizawlpost.org/wp-content/uploads/tap_logo-min-large.jpg)