Daily Newspaper

HSSLC 2020 exam-ah 78.52% hlawhtling Deficit school ti tha ber: MBSE Chairman

31

Aizawl, July 15 : Higher Secondary School Leaving Certificate (HSSLC) Examination 2020 result chu nimin July 14 khan Mizoram Board of School Education chuan a ti chhuak a, stream hrang hrang pathum, Arts, Commerce leh Science-ah zirlai exam beitu 12,324 zinga zirlai 9,677 an hlawhtling a, zirlai hlawhtlingte hi za zela 78.52 an ni. 

Nikum 2019 khan zirlai za zela 78.94 an hlawhtling a, kumin result-in nikum result a phak lohna chu 0.42% a ni.

MBSE Chairman F. Lianhmingthanga chuan management wise-a thlirin deficit higher school an ti tha ber a, a dawtah private/adhoc school te niin sawrkar school chu pathumna an ni, a ti a. Covid-19 hrileng avangin exam neih lai chawlhsan a ni a, subject panga exam zawh hman lohvin a awm a, tum hnih exam chhunzawm tura ruahmanna a tlawlh hnuah, July 1-3, 2020 chhung khan exam zawhfel theih a ni, MBSE chairman chuan a ti a. Exam beituten hrileng avangin an tihchhiat phah lo nia an ngaih thu a sawi bawk. MBSE chairman chuan exam-a hlawhtlingte a lawmpui rualin, hlawhtling ta lote pawhin beidawng lova theihtawp chhuaha bei chhunzawm turin duhsakna a hlan a ni.

Kumin HSSLC result pumpuiah distinction 431, first division 2806, second division 4,049 leh third division 2,391 an awm a. Kuminah hian zirlai zaa za pass-na school hi Arts-ah 29, Science-ah 1 leh Commerce-ah 8 an awm a. Failed vekna school pahnih (Science leh commerce) a awm bawk. Kuminah hian zirlai 2551 an fail a, compartmental chance nei 96 an awm bawk.

Stream hrang hrangah Commerce an ti tha ber a, 85.18% an pass a, Science-in dawtin 79.40% an pass a, Arts chu pathumna niin 77.90% an pass a ni.

Commerce stream-ah hian zirlai exam 587 an awm a, zirlai 500 an pass a. Distinction-ah 55, first division 175, second division 202, third division 68 an awm.
Science stream-ah zirlai exam 2267 an awm a, 1800 an pass. Distinction ah 117, first division 880, second division 754, third division 49 an awm.

Arts stream-ah zirlai exam 9,470 awmin 7,377 in an pass a; distinction-ah 258, first division-ah 1,750, second division-ah 3,092, third division ah 2,277 an pass a ni.

MBSE chuan Compartmental chance nei tan exam hunah 11th August, 2020 a ruat nghal a, exam centre pathum – Govt Mizo HSS, Aizawl; Govt HSS, Lunglei leh Govt HSS, Siaha te a ruat a ni. Answer paper ennawn dil duh tan July 29, 2020 thleng hun hawn a ni a, subject pahnih aia tam ennawn dil theih a ni lo.

HSSLC TOPPERS

Arts Subject-ah Christina Lalchhandami d/o Lalrawna, Greenland HSS, Aizawl chu topper niin, Mark 500-ah 454 a hmu. Christina hian topper nih a inbeisei loh thu a sawi a; graduate hnuah competitive lama kal a duh thu a sawi. Tlangnuam Aizawla cheng a ni.

Science subject-ah Lalremsiama Darchhun s/o Vanlalpeka, St. Paul’s HSS, Aizawl chu topper niin mark 500-ah 470 a hmu. Lalremsiama hi kum 2018-a HSLC topper kha a ni a, HSLC examah kha chuan topper nih a inring lova, tun tumah hi chuan, an sikul-a exam result a neih dan atangin topper nih theih a inbeisei ve tawh thu a sawi. Nuclear scientist nih a tum. Tanhril, Aizawla awm a ni.

Commerce subject-ah Lalhriatpuia Ralte, s/o Lalthanpuia, St. Joseph HSS, Aizawl chu topper niin, mark 500-ah 455 a hmu. Hriatpuia hian topper nih a inrin loh thu a sawi a. Banking lam a tui thu a sawi. Lunglei Chanmari II-ah an cheng mek a ni.

ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy