Hand Holding Policy kalpui dan tur relin Mizoram State Policy Coordination Committee chu an chairman, chief minister Lalduhoma hoin Zirtawpni khan an thukhawm. Sawrkar kum kal mekah chuan huam zau lutuk loa bul tan phawt tum a ni tih sawi a ni.
Chief minister chuan beneficiary thlan thu ah line department-ten a hlawhtling ngei turte chauh thlang tura chahin, duhsak zawngte hnena pek mai tur a ni lo tih hriatchian a tul hle tih a sawi. Hand Holding Policy a nih ang ngeiin a dawngtute chu chik taka enkawl zui a, sum leh pai enkawl dan leh an hnathawh dan chena tanpui tur an ni, tiin, Bana Kaih kalpui dan tur a sawi a ni.
PMEGP leh KCC loan hmanga eizawnna bul tantu, tha taka an loan rul thei thlanchhuahte hnena central interest subsidy awmsa bak hand holding atanga subsidy dang pek belh leh, heng loan laa bul lo tan tawh engemaw harsatna avanga kal zui thei lo khaichhuah dan (gap funding) tur, Planning Board lam ruahmana Zau hmalakna kalpui dan turte an sawi a. Sawrkar guarantor-a tanga a tling leh tlakte hnena loan pek pawh sawi niin, he ruahmanna hi chu la ngaihtuah that leh tura tih a ni.
Chief Minister’s Special Hand Holding Package siam chungchang pawh sawi a ni. Heng ruahmanna an sawi ho hi a tul anga la ennawn zel tura tih a ni.
Sawrkar kum kal mek hi Year of Consolidation (inpuahchah kum) a nih angin Hand Holding Policy hi huam zau lutuk loa bul tan phawt tum a ni tih an sawi.
Huam zau lutuk loin Hand holding policy kalpui tum
