Hulhliap camping
thawhkhatna zo
Mizoram sawrkarin ruihtheih thil avanga harsatna nei mekte chhanchhuah an nih theihnana a bultum, Hilhliap Short Stay Centre thawhkhatna chu a zo a, Inrinni khan an chhuak.
Sawrkar, tlawmngai pawl leh kohhran tanghoin an buatsaih Hulhliap SSC program-ah hian Synod Revival Camping Center Neihbawiah ruihhlo avanga harsatna tawkte mumal taka enkawl niin, ni 20 chhung a awh a. A thawhkhatnaah hian mi 150 enkawl tum an nih laiin, mamawhna avangin mi 200 chuang dahluh an ni. Engemawzat chu a tawp thleng loa tlanchhuak lehin, a tawp thleng hi mipa 105 leh hmeichhia 14, an vaiin 119 an ni.
Camping neih chhung hian Pathian thua kaihhruai an nih bakah an taksa in ruihhlo a mamawhna zualpui phuhruk thei turin damdawi lam thiamna leh rilru lama harsatna awm thei thlengin mithiamten an enkawl a ni.
Camper chhuak turte hi Hulhliap Core Committee chairman, Mizoram Youth Commission chairman Malsawmzuala Ralte leh Hulhliap CC secretary, Social Welfare director Dr Lalhriatzuali Ralte ten a hmun atang hian an thlah a. Mahni chhungte lamtu neilo chu an kal tanna Bawngkawn YMA Hall leh Central YMA office Tuikhuahtlangah phurh thlen phawt niin, heta tang hian a then an chhungten an lam a, a then mahnia haw an awm. Central YMA office-ah hian Social Welfare minister Lalrinpuii pawhin lo hmuakin, camp chhuakte a kawm bakah fuihna thu a sawi a ni.
Tuna camp chhuakte hi anmahni duhthu in mipa pahnih chu PISGAH Reformatory Center Thingsulthliahah dah an ni dawn a, hmeichhe pakhat chu Shakti Sadan Maumualah a lut thung ang. A bak zawng hi mahni in lamah an haw a ni.
Hulhliap program hi camp chhuak ina hawte tan la chhunzawm zel niin, after care follow-up, psycho-social counselling hmangin volunteer psychologist leh social worker mi 40 rualin an vil zui ang a, thla thum chhung a tul angin an enzui dawn a ni. Sawrkar ruahman dan chuan, camp atanga damna change tan hian after care skill training leh Bana Kaih hmanga chhawm chhunzawm tum a ni a. Hetiang tihna tur hmun remchang hi dap mek a ni.
Hulhliap campingthawhkhatna zo
