Hmai Hrahsel
Project Save Tlawng
Tui, kan nunna hnar, a tel loin mihring te ni 3/ni 4 aia rei kan dam thei lo a, kan tui tlan a thianghlim loh chuan kan hrisel thei lo bawk. Mihring kan pung telh telh a, khawsak a changkang telh telh a, kan tui mamawh a san chhoh zel lai hian min chawmtu lui/tuikhur te hian furah leh thalah kan mamawh tui thianghlim min chawm zo ta meuh lo a ni. Siamtu min duansak, kan ram Zotuithiang kan ti chhia in kan ti riral mek a, a tlai luat hma in I tuai tharin, I humhalh ang u.
Thing leh mau leh nungchate hi tuihna siamtu an nih avangin kan humhalha duat taka kan enkawl a tul a ni. A bik takin kan lui/tuikhur hnar, a chhehvel leh lui kam tawn tawn a thing leh mau leh nungchate I humhalh ang u. Heng hmunah te hian thing leh mau an lo chereu nasa tawh viau anih phei chuan kan phun belh nghal vat a tul a ni.
Bomb leh tur hmanga lui sangha man hian lui ecosystem pumpui, lui chhunga thil nung cheng zawng zawngte a suasam in a nghaisa a, tih loh tawp tur, Dan pawhin a khap a ni. Tur a hrai lui tui hi mihring ei in atan a hlauhawm bakah tur a hrai sangha ei hi a hlauhawm bawk, sangha a tur chambang kha a la thih mai loh avangin. Tur a lui suasam hian a nghawng a nat em avangin kan lui tam tak hi chuan ngai awh hleithei lovin, an thar chhuah thin ang pawh thar thei tawh lovin an awm mek a, chhan tlak erawh an la ni ang.
Luikawr ten lui te an fin a, lui te ten lui lian an fin leh a, chuvangin lui lian thianghlim leh hrisel turin a fintute kan vawn fai a ngai a ni. Kan lui/tuikhur ti bawlhhlawh a ti chhe vek thei hlauhawm tak chu tawih theilo plastic bawlhhlawh hi an ni a, lui a nungchate inzawmna leh chenhona ti buaiin lui hriselna an ti chhe vek thei a. Kan lui/tuikhur ah heng bawlhhlawh te hi I piah lo ang u. Tin, mihring leh kan ran vulh te zun leh ek lakah pawh kan lui/tuikhur te kan vawnhim an ngai. Khawpuiah mi thenkhatin an septic tank tan soak pit siam lo a, luikawrah luan tir te hi tih loh tawp tur a ni.
Kan tui tlan te an thianghlim a, an hrisel theihnan chhungkaw tin ten kan bawlhhlawh leh hnawmhnawk te uluk taka kan sawngbawl a, a paihna hmun tura ruat ah chauh kan paih tur a ni a.
Lui a lung te hian lui hriselnan hnathawh tangkai tak an neih avangin thil danga hman atan lak chhuah loh tur a ni.
Hmasawnna hnathawh pawimawh tak kawng laih hnathawh ah leivung hi kawngthlang a nawr liam ringawt a nih chuan luikawr te, lui te a chhilh a. Hei hi kan tui tlan te tan a pawi takzet a, thing leh mau leh nungchate pawhin an tuar bawk a; Dan in a phal lo a ni tih kan hriat a ngai a. Hetiang ti contractor te chuan Environmental Law an bawhchhia a, thuneitute hnena report vat hi kan duty a ni.
Khawpuia hmun nei zau remchang te leh thingtlang a hmun awl ala awm thatna hmunah chuan ruahtui khawlna siam hi a tangkai in a tha hle a ni. Ruahtui khawl tur kan neih zelna turin ruahtui ko tu thing leh mau leh nungchate humhalh bawk ila.
Tui renchem leh daih zai taka hman hi mitin mawhphurhna leh awlsam taka kan tih theih theuh a ni a. Entirnan kan eirawngbawlnaa thlai kan silna tui te chu pangpar/thlai tui pekna atan kan hmang thei a; thawmhnaw kan suk a, kan tleuh faina tui te chu chhuat nawhna, lirthei silfai na etc atan te kan hmang leh thei a ni. Heng tui renchem dan leh adangte, kan nintin nun tibuai silo te hi chhungkaw tin ten tih thanah nei theuhvin kan tu leh fate I zirtir ang u.
Khawvel hmun dangte ang bawkin kan ramah ngei pawh tui harsatna leh indaihlohna nasa tak kan hmachhawn mek a, thal lai phei chuan kan tui lakna te an kang chat lek lek hial a ni a. Heti chung hian kan ramngaw hlu tak te kan tih chereu belh zel a, kan lui tui te kan ti bawlhhlawh a, tawih theilo leh kan hnawmhnawk dangte kan duh duh naah kan paih darh nuai mai bawksi. Tuna kan kal dan pangngaia kan kal zel anih chuan kan hmabak ava thim tak em! Tui harsatna rapthlak zawk kan chunga thleng mai thei laka kan fihlim theihnan tui renchem leh tuihna humhalh kawngah mitinte tangrualin, I thawk ho ang u.
Keini hmeichhiate, inchhung khur a dinhmun pawimawh tak luahtute hian kan tuihna leh lui humhalh kawnga tih tur leh tih loh tur kan sawi tak te hi kan chhung te theuh in an zawm nan theih tawp chhuah ila., chutiang zelin khawtlangah pawh hma la ila danglamna kan thlen thei ngei ang. Hei lo hi ram dang kan nei lo, kan ram lui kan nunna hnar I enkawl tha ang u.