Hun ruatsaah hna zawh kan beisei
– UD&PA minister
Mizoram Urban Development Agency Limited (MUDAL), Public Works Department leh Urban Development & Poverty Alleviation hnuaia project hrang hrang chu Thawhtanni khan UD&PA minister K Sapdanga’n tlawhin an hmalakna a enfiah a. Aizawl khawpui hmasawnna atana hmalakna tam zawk chu a hun taka zawh hman an beisei tih a sawi.
PWD hnuaia Solid Waste Mangement Center Hualngohmun ami tlawh hmasa berin, MUDAL hnuaia project pathum – Community Recreation Centre Venghnuai, Zemabawk Playground leh Dawrpui New Market-a City Centre a tlawh zui a. Zodin Square-a Multi Level Car Parking a tlawh bawk.
Hualngohmuna SWM Centre din mek hi SASCE 2021- 2022 atanga thawh niin, tunah hna zaa 74 thawh a ni tawh a, zawhfel thuai beisei a ni. Venghnuai-a Community Recreation Centre-ah hian Futsal, Badminton cum TT Hall leh Cricket practice pitch awm tura ruahman niin, SASCI atanga fund a ni a, tunah hna zaa 92 zawh a ni tawh. Zemabawk Playground sak hi hna zaa 93 zo tawhin, kumin December hian zawh hman beisei a ni. Dawrpui-a City Centre sak hi nakum September-a zawh hman beisei niin, Zodin-a Multi Level Parking-ah hian chhawng 8 a awm a, four wheeler 94 leng theia ruahman a ni. Chhawng chhung berah hian cafeteria leh cinema hall awm tura ruahman niin thawktute chuan peihfel thuai an inbeisei tih an lo sawi a ni.
Minister hi UD&PA hotute leh a kaihhnawih sawrkar hotu dangten an tawiawm.
Hun ruatsaah hna zawh kan beisei – UD&PA minister
