Daily Newspaper

Hunpui laia khap tumah hmalak ho dan rel

27

Kumin Diwali/Puja lai leh Krismas leh kumthar vuakveta Mizoram sawrkarin halpuah, halmawi, silailem mu nei chi leh sky lantern zawrh leh hman khap a tumnaah Information & Public Relations department hotute leh Mizoram Journalists’ Association Gen. Hqrs. office bearers chuan he khapna a hlawhtlin theihna tura hmalakna pawimawhte sawiin Nilaini khan an thukhawm.

I&PR director Lallianpuii chuan sawrkarin hmalakna thar a neih changa mipui zirtirna leh hrilfiahna kawnga MJA ten sawrkar tha taka an thawhpui thinnaah lawmthu sawiin, mipuite hmakhaw ngai tak chunga theihtawp an chhuah thin chu lawmawm a ti a. Thawhhona tha an neih chhunzawm zel a tul, tiin, “Sawrkarin kumtin halpuah leh halmawi khapna a tichhuak thin a, kan zawm tha tawk lo emaw ni chu aw tih tur hian thil a awm thin a, tunah pawh hian nasa lehzuala tan kan lak a ngai a ni,” a ti.

MJA president Zonunsanga Khiangte chuan sawrkarin an chungah rinna a nghat thin chu lawmawm a tih thu sawiin, mipuite tana tha tur leh an himna tur zirtirna kawngah theihtawp chhuahin tan an la ve reng dawn tih a sawi a ni.

Hmalak dan tur tha hrang hrang sawi ho zingah, supply awm lo tura a rang thei ang bera tun atanga chet lak a tul thu leh ramri luhka pawimawhah lirthei lut reng reng uluk taka endik leh bazar-a zawrh a awm leh awm loh thlithlai tura police hotute hnena ngenna siam te, Mizoram Merchant Associaiton hnenah an member-te zingah hetiang, sawrkarin a khap thilte hi Mizorama lalut lo tura hma la tura ngente, kum hmasa lama he khapna bawhchhia sawrkarin a mante hrem an nih dan puanzarte a tul tih sawi niin, hremna hi a na tawk lo nge dan kenkawh that a nih lo zawk tihte pawh zirchian a tulin an hria a, sawrkarin kumtin khapna thupek a chhuah thin chungin tunhma lama tha taka zawm a nih hnuah tunhnai kum tlemte kalta atang khan zawm a hlawh leh ta lo nia lang chu, he hmalakna kawngah tan thar a ngai hle tih sawi a ni.

Heng bakah hian halpuah leh halmawi halna hmun hi veng tinah a tam ngai loa, police lamin mobile team siam a, hetiang hal a nihna hmun hi rang taka pan thuai thin a that an rin thu te sawi a ni a. Chanchinbu, TV leh radio kaltlangin halpuah leh halmawiten kawng hrang hranga mihringte harsatna a thlen dan uar lehzuala puan te, editorial leh article hmanga nasa lehzual zirtirna pekte a tha tih a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy