Hunpui laiin halpuah/halmawi
lam chi zawrh/hman khap dawn
Home minister K Sapdanga hoin kumin Krismas leh kumthar vuakveta halpuah, halmawi leh puakthei thil khapna thupek (prohibitory order) leh “The Mizoram Firecrackers (Regulation & Control) Bill 2025” chungchangah Ningani khan a kaihhnawih sawrkar hotute leh tlawmngai pawl aiawh an thukhawm.
He Bill hi kumina hmang nghal tur chuan hun a tepter tawh si a. Nakkum Budget Session-a regular bill anga putluh tha zawkin an hria a, chutiang tur chuan rel a ni.
Kumin hi halpuah leh halmawi halin mihring leh ran laka nghawng tha lo a neih theih zia inzirtir uar kum “Year of Awareness Campaign on the harmful effects of Firecrackers” atan hman nise, kum dang zawng aiin awareness campaign uar ni se, tiin a rel.
Kum danga kalpui angin, Central YMA kaltlangin YMA member tin hnenah, kohhran tin kaltlangin kohhran mite hnenah, central para military force, central police organization ho, Mizoram Merchant Association (MIMA) leh online marketing agency hnenah leh General Administration Department kaltlangin sawrkar hnathawkte hnenah khapna thupek zawm theuh tura ngen leh nise; halpuah, halmawi leh puakthei thil lakluh, zawrh, lei leh hal khapna thupek tha taka mipuiin an zawm theihnan CYMA, local council, magistrate leh police-ten thawk ho se, tiin a rel bawk.
Hunpui laiin halpuah/halmawi lam chi zawrh/hman khap dawn
