Krismas leh kumthar vuakvetah Mizoram sawrkar chuan halpuah leh halmawi lam chi a khap leh dawn a. Kum kalta chhung khan hetiang kaihhnawiha dan bawhchhia mi 7 thu thiam loh chantir an ni.
Thawhtanni khan Home minister K Sapdanga hoin a kaihhnawih sawrkar hotute leh Central YMA, Aizawl City Local Council Association leh Mizoram Merchant Association hruaitute an thukhawm a. Home minister chuan hriselna kawnga nghawng tha lo tak thlentu halpuah leh halmawi hrang hrang ven leh hemi ti lo tura mipui zirtir kawngah tanrual a pawimawh tih a sawi. Kum dang zawng aia hmaa sawi ho a ni chu lawmawm a tih thu leh rah tha a chhuah ngei a beisei thu a sawi a. Dan bawhchhiate laka hremna lekkawh zel chu halpuah leh halmawi hal dona kawnga inzirtirna pawimawh tak a ni tih a sawi.
Chief secretary Dr Renu Sharma pawhin hmundang ngaihtuahin Mizoram boruak chu la thianghlim hle mah se, vawnghim zel tura tan lak a ngai a, boruak bawlhhlawh zel tur ven lawk a ngai tih a sawi a. A hun taka chet lak a tul thu leh inzirtirna zau zawka kalpui a tul thu sawiin, sawrkar mai nilo, kan zavaia tanrual a tul dawn tih a sawi a ni.
Kum hmasa lama hmalak dan thlirlet a ni a. Report danin, kum kalta hunpui vuakvetah khan halpuah leh halmawi kaihhnawihah police-in case 5 ziaklutin mi 9 an man a, an zinga 7 hi thiam loh chantir an ni tawh. Boruak bawlhhlawh dan tehna, Air Quality Index (AQI) chuan halpuah leh halmawi hal vanglaiin a tehnaah 300 a hawlh kai a, hei hi boruak bawlhhlawh hle china ngaih a ni.
Hunpui laia hma lak dan tur:
8 Hunpui vuakveta dan leh thupek kenkawhah khauh lehzualin sawrkar a kal dawn.
8 Halpuah leh halmawi lam chi reng reng khauh zawka khap nise tih a ni.
8 Mipui hnena inzirtirna zau zawka kalpui dan tur ruahman niin, halpuah zuar leh hal report zung zungna tur siam leh nise an ti.
8 District tin magistrate-te chu halpuah leh halmawi lam chi reng reng khapna thupek chhuah tura hriattir tura tih a ni.
8 Veng leh khua tinah tlangauin ngenna siam nise, kohhran tawiawmna ngen ni se, media platform hrang hrang tangkai taka hman nise.
8 State pawn atanga halpuah lakluh thin tihtawp (supply reduction) a nih theih nan ramri dep entry point-a ngun taka duty insiam leh lirthei veivak endik, online hmanga chah thin ven, police leh YMA tang hoa foot/mobile patrolling neih tum a ni.