Daily Newspaper

Hunpui laiin khuahkhirhna tikhauh zual dawn; Thil tihkhawm lam uar lo turin mipui chah

9

Aizawl, December 18 : Covid-19 laka himna turin hunpui laiin tuna inkhuahkhirhna hman mek chu khauh lehzuala kalpui sawrkarin a rel a. In khata cheng ni lo chhungkuaa chaw eikhawm leh pawl leh thianhoa thil tihkhawm lam insum turin mipui an chah bawk.

Mizoram Covid-19 dinhmun thlirhoin Ningani khan Health & Family Welfare minister Dr R. Lalthangliana kaihruaiin thutkhawm a ni a. I&PR minister Lalruatkima, chief secretary Lalnunmawia Chuaungo bakah Health secretary, Home secretary, Addl DGP leh Covid-19 dona kawnga hma latu team hrang hrang aiawhte, Indian Medical Association, Mizoram Kohhran Hruaitute Committee leh Joint NGO Coordination Committee aiawhte an tel.

Hunpui lo thleng turah fimkhur a tul lehzual tih sawi niin, zan curfew dar 8.00 atanga tan pawh khauh lehzuala kalpui tha an ti a. ‘Chetsual palh chuan hunpui boruak avang hian hri kai darh huk thei kan nih avangin a hma zawng aia khauh leh fimkhur lehzuala sawrkar dan siamte kenkawh ni se,’ an ti. Dawr leh sumdawnna hmuna SOP zawmlote chungah pawh khauh taka action lak tha an ti.
Khawvel hmundanga zirchiannaah chhungkaw inhmuhkhawmna atanga hri inkaidarh an tam tih tarlan niin, Mizoramah ngei pawh hetiang case hi a awm nual tawh tih sawi a ni a. Mipuite chu hunpui vuakvetah chhungkaw chengho ni lo chu chhungkhat laina chaw eikhawm leh inhmuhkhawm buatsaih loh nise an duh thu an sawi. Chutiang bawkin thianho leh pawlho inhmuhkhawm pawh sawrkar dan bawhchhe zawnga neih loh nise an duh thu an sawi a ni.

November thla tira lockdown puanin a tha zawnga awmzia a neih thu sawi a ni a. Hri kai hmuhchhuah tharte chu a tam zawk state pawn atanga rawn lut an nih thu te; contact tracing lamah harsatna em em an tawh rih loh thu te an sawi. Pawl hrang hrang aiawha sawmten sawrkarin Covid-19 dona atana dan a siam – SOP chu tun dinhmunah a tha tawk hlea an hriat thu an sawi bawk.

Khawpui atanga hunpui hmang tura mahni khaw lama haw turte chu an haw hun bituk loh tur a ni tih sawi a ni a. Hrileng laka invenna kawnga zawm tur pawimawh zingah mask vuah chu mipuiten an zawm tha thawkhata hriat a ni a, social distancing zawm kawngah tun aia fimkhur lehzual a tul thu sawi a ni.

Health minister chuan Covid-19 dona kawngah sum lamah harsatna awm loin chief minister Pu Zoramthanga a inhawng tih a sawi a. Tlawmngai taka Covid-19 dona kawnga thawktu, volunteer-te lawmman tur pawh peihfel tawh niin, Krismas hma ngeia pek tum a ni tih a sawi.

I&PR minister chuan thingtlang lama chengten Covid-19 vanga harsatna an tawh loh nan MGNREGA kaltlangin ni 100 inhlawhna theihtawpa chaka bawhzui a nih thu leh kumin December thleng hian chawhrualin Mizoram pumah ni 90 inhlawhna siam ni tawhin, siam belh leh turin sawrkar laipui nawr mek a ni tih a sawi.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy