Daily Newspaper

Huphurh vangin Congress-in min bei – ZPM

6

Aizawl Municipal Corporation inthlan leh Serchhil bial by-election ah sawrkar lai party mai niloin an opposition party pui Congress pawhin an huphurh vangin an bei tih Zoram Peoples’ Movement party chuan an sawi.

ZPM Gen. Hqrs. thuchhuak chuan, 2020 September 24 khan Mizoram chief minister hlui leh MPCC president Pu Lal Thanhawla chuan thuchhuah siamin, MNF MLA-ten Assembly speaker hnena Pu Lalduhoma an hek chu Mizoram mipui leh Serchhip bial mipui zahlohna leh pawisak lohna lian tak nia a hriat thu te, Pu Lalduhoma leh a thawhpui MLA-te chu ZPM MLA-ah Congress party chuan a pawm thlap thu te, thil kalphung langchiang sa reng, mipui pawhin an pawm thlap thil chingpawr lui a, ram leh hnam hmasawnna leh ram tana thil tha zawk tur ngaihtuah vang pawh ni loa mahni thawhpuite paihthlak tuma hmalakna a dem thu te, MNF MLA-te hmalakna avanga Mizo Kristiante hming a chhe zawnga hriatreng a ni tawh tur chu pawi a tih thu te a sawi a ni tiin, speaker-in Pu Lalduhoma MLA atanga a ban a dem thu uar taka a chhakchhuah hnu lawkah, December 15-a an party office, Bhavan kharna hunah a thu sawi tawhte zuk zawngin thu a sawi leh niin a tarlang.

‘MNF MLA 12 ten an hek avanga Mizoram State Legislative Assembly speaker-in a ban tak Pu Lalduhoma thlavang hauh tawhtu, hun rei tak Mizoram hruaitu lu ber ni tawh, MPCC president Pu Lal Thanhawla’n hun reilote chhunga a thusawi a zuk leh ta mai hi a mak a. Hun rei tak chief minister ni a, ram khat hotu lu ber ni tawhin kar loa thu lianpuia a tanna a thlak ta mai hi ram hruaitu tihawmah kan ngai loa. AMC inthlanleh Serchhip bial by-election neih turah ZPM party an huphurh vang niah kan ngai,’ a ti.

ZPM party chu hmanni lawka piang, fuke kim pawh pu hman meuh lo a nih laiin, a dintirh phat atangin beitu leh ertu tam tak karah harsa takin tun dinhmun hi a thleng chho tih a sawi a. ‘Tunhnaiah phei chuan Zoram mipuite rin hlawh ber leh innghahna awmchhun party niin, party thangduang tak, opposition party ni chunga zawmtu ngah ber kan ni chho ta a, rorelna chelh mektu MNF party tan chauh ni lo, kan opposition party puite tan pawh mutmawh hnarmawha neih tham a ni ta hial nge, rorel lai khalhngilna kawnga tangho tur nia kan inngaih laia kan opposition party puite atanga beihna kan tawk fo mai hi hriatthiam har kan ti hle,’ ZPM chuan a ti.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy