Hydel project outsource tumna hi…

Mizoram sawrkarin, Hydro Electric Project (HEP) kan neih mek 14 zinga 8, outsource a tum chungchang chu nimin khan Congress lamin rawn au chhuahpui a, “He thil hi kan ram leh hnam tana thil pawi thei a nih avangin, kan sorkar hian kaltlangpui lo hram se tih hi kan duh dan leh ngenna a ni,” an ti.
Outsource tum zingah hian Mizoramin kan chhawr tangkai ber pakhat, hlawkna tam tak thawk chhuak mek ni bawk, kawlphetha Megawatt 12 pe chhuak thei, ‘Serlui B Hydel Project’ pawh a tel a.
Congress-in an chhût chhuah dan chuan, kum 10 kalta chhunga Serlui B Small Hydel Project-in Power a tharchhuah hlutna hi cheng vaibelchhe 129.53 chuang a ni a. Hetiang zat power pe chhuak tura senso zat chu cheng vaibelchhe 51.39 chuang a ni bawk a. Chuti chuan, he Serlui B Hydel Project-in kum 10 chhunga hlawkna a thawh chhuah chu cheng vaibelchhe 78.14 chuang a ni a; chumi awmzia chu, chawhrualin kum tin hlep cheng vbch 7.8 a siam tihna a ni.
Hydel Project outsource tur zingah hian hlep tha tak siam thei Maicham Phase-I SHP(2MW) leh Maicham Phase-II SHP(3M) pawh an tel nia tarlan a ni bawk.
Hetianga kan hlawkpui mek ni si, eng vanga sawrkar hian, hlep tha tak nei, kan hlawkpui em em kan hydel project-te hi enkawl ve ta che u, tia midang hnawn tum ta ngawt nge a nih(?) tih hi zawhna lianpui mai a ni awm e. Hei hi a chhan leh a vang sawrkar hian a sawifiah a ngai a, ‘kan duh duhin kan rel thei’ tih liam ngawt chi pawh niin a lang lo.
Electricity Power lama intodelh tuma hydel project dang pawh din belh tum mek a nih laia, enkawl zawh loh pawh ni lo, sum hlohna pawh ni lo, hlawkpui reng ni bawk si, midang hnena ‘lo hlawkpui ve tawh rawh u’ tih ngawt mai hi a kawnghmang lo hle a ni.
A lehlamah chuan, Congress lam hian an lo chhût dik lo emaw, an lo chhût sual emaw te a lo ni thei a, “In chhût dan a dik lo alawm, hei hi a dik zawk a ni a, midangin an enkawl hian kan thatpui zawk dawn a, kan thatpui theih dan chu hei hi a ni,” tia chiang fek fawka sawrkar lam hian an sawifiah theih a pawimawh dawn ta hle a ni. Chumi sawifiahna hriat ve chu mipui right pawh a ni nghal awm e.