Minister F Rodingliana chuan Inrinni khan British deputy high commissioner for Eastern India Andrew Fleming chu a chenna Kolkata-ah hmuin, kumin January 6-a chief minister leh British deputy high commissioner inbiak tawh bawhzuiin an inkawm.
Power & Electricity minister hian British deputy high commissioner hnenah Mizoramin kawlphetha megawatt 4000 tharchhuak theia theihna a neih thu leh tuna siamchhuah chu beitham tak a nih thu a hrilh a. Sawrkarin kawlphethaa Mizoram intodelh mai bakah hralhchhuaktu nih a tum thu sawiin, theihtawp chhuahpui a, foreign funding leh foreign investor-te zawnpui turin a ngen.
British deputy high commissioner chuan Mizoram chanchin a lo hriat nual tawh thu sawiin, power sector-a investment ti tur foreign company a zawnpui tur thu a lo hrilh a. UK lama investment khawihtu UK Export Finance dawrin, Mizoram tan eng project nge awm thei tih a lo enfiah tur thu a sawi a ni.
P&E minister hian New Delhi Mizoram House-ah sawrkar laipui hnuaia awm Water and Power Consultancy Services (India) Ltd (WAPCOS) hotute hmu in, MW 24 ve ve pe chhuak thei tur Tlawng leh Tuichang Hydel Project-a DPR siam tur a sawifel pui a. World Bank hotute nen pawh inbia in, Mizoramah cheng vaibelchhe 411.19 hu hnathawh mek leh thawh hmabak an nei tih an lo hrilh. Project thar awm thei tur sawihoin, la bawhzui zel nise tiin thu an dah.
4British deputy high commissioner British Army-a Mizo thalai tam zawk an luh theih dan a lo enchian tur thu sawiin, Commonwealth ramte tan ngainathiamna thar British sawrkarin a siam chu chhawr tangkai dan dap tlan a nih tur thu a lo hrilh.
4Mizoramin agriculture technology (agritech) lama hma sawn a la ngaih nasat zia a lo hriat thu sawiin, hma lakpui a inhuam tih a sawi.
4Minister F Rodingliana hian Mizo thlalai, zirlai leh hnathawk tura UK pan tumten awlsam zawka visa an neih theih nan hma lakpui turin British deputy high commissioner hi a ngen.