Auto Expo 2023-ah an phochhuak a, booking an hawng nghal kha a ni a, Hyundai chuan an Grand i10 Nios facelift chu India-ah an tlangzarh ta a, showroom-ah Rs 5,68,000 man atanga in tanin, model a zirin Rs 8,46,000 man thlengin a awm. Grand i10 Nios tar hi a pawnlam landan leh chhunglam awmdan pawh an tidanglam nual a, a engine pawh an khawih danglam deuh a, tihbelh an nei bawk a, petrol leh CNG engine-ah duhthlan tur awmin, manual leh AMT gearbox a awm bawk a, model chi li- Era, Magna, Sportz leh Asta-ah duhthlan tur a awm bawk e.
Grand i10 Nios thar hi a grille an tidanglam a, a lian ta zawk a, LED DRLs design thar neiin, a model sang deuhah chuan alloy wheels design thar a nei bawk. A hnunglamah tail lamp leh hatch an tidanglam deuh a, detailing thar leh a hnunglam light cluster zawmna lightbar thar a nei bawk. A chhunglamah a cabin an tidanglam nual a, generic analogue instrument cluster neiin, thil thar an nei nual a, a seat fabrics an thlak a, dual-tone grey or all-black cabin finish-ah duhthlan tur a awm bawk.
A engine-ah a hmaa awm thin 1.0-litre T-GDi turbo-petrol engine a awm ta lo va, 1.2-litre naturally aspirated petrol engine neiin, 82 bhp leh 113.8 Nm torque pechhuak thei a ni a, 5-speed manual gearbox a nei bawk. A model-ah Magna chin chunglamah 5-speed AMT a awm tel a, Magna leh Sportz-ah hian factory-fitted CNG kit a awm bawk. Nios CNG hian 1.2-litre a hmang ve tho a, mahse, 68 bhp leh 95.2 Nm torque pechhuak thei a ni ve thung a, manual gearbox chauh a awm bawk. Company lam chuan petrol leh CNG engine te hi E20 ready ve ve niin an sawi a, 20 percent ethanol-petrol chawhpawlh hmang thei a ni.
A safety feature an tithar nual a, a model hniam ber thlengin dual front leh side airbag a nei a, Asta model chinah chuan curtain airbag a awm bawk. Magna, Sports leh Asta ten tyre pressure monitoring system an nei vek a, Magna AMT, Sports leh Asta chin-ah hill star assist leh ESC awmin, a model sang hoah chuan 8.0-inch touchscreen neiin, smartphone nena thlunzawm theih a ni a, keyless go, cruise control, auto climate control, auto headlamp te pawh a nei.