Daily Newspaper

I INREM TLANG DIAL DIAL ANG U

11

-Ramhluna Hnamte

“ Ebony and Ivory live together in
perfect harmony
Side by side on my piano keyboard,
Oh Lord, why not we?”

He hla ‘Ebony and Ivory’ phuahtu Beatle Paul McCartney hian “ Piano keyboard-a a dum(ebony) leh a var (ivory) in kawpin rimawi, mawi chungchuang tak a siam thin ang hian hringfate zingah pawh midum/vun hang, mingo/vun ngo, vun eng,vun sen tia inthliar hrang lova heng kan vun rawng inanlohna/danglamna te hi indeuhsawh leh inhmuhsit nan hmang mai lovin, piano keyboard a ‘ebony’ thing dum leh ‘ivory’ saingho var inkawp remin rimawi(harmony) mawi em em an siam chhuak ang hian keini pawh hian chi leh chi, hnam leh hnam, ram leh ram hrang inthliarna te leh vun rawng inanloh vanga inthliarna te hi kalsanin kan inanlohna hrang hrangte hi rimawi mawi tak, ngaihnawm tak, inremna leh inngeih dial dialna, remna leh muanna rimawi siam nan i hmang zawk ang u” a tihna a ni ber mai. Chutah a zai(duet) pui turin mihang zaithiam lar Stevie Wonder a han thlang leh kher te hi a fuh leh zual em em leh zel a nih hi. A Beatle member pui John Lennon pawh kha khawvela remna leh muanna duh tu, khawvela remna awm theih nan a hla a phuah mai baka chetzia a entir hial thin kha a ni a. A hla ‘Give Peace a Chance’ tih te ‘Imagine’ tih te phei chu tun thlenga khawvel a ‘Remna’ hla tha leh tlo a la ni. ‘Imagine’ tih hlaah phei chuan sakhaw hrang hrang rin hranna te, sorkar hrang hrang lo awm te, mi hausa leh rethei kan awm te hi khawvela remna leh muanna awm theih loh chhanah puhin chi leh chi inthliar tawh lovin, sakhaw biak hrang pawh nei chuang lo leh mihausa leh retheite awm chuang lova neih intawmin khawvelah hian cheng dial dial ila, chutah chuan remna tluantling chu a awm ang tiin a duhthusam a lo auchhuah pui tawh bawk a nih kha.

Paul McCartney leh Stevie Wonder te hlasak dun ‘Ebony and Ivory’ hi March ni 29,1982 ah released a ni a, UK Charts-ah an released kum April ni 24 khan Number 1 a kai nghal a, chawlhkar 3 zet number 1 ah hian a thu a ni. Hetih lai tho hian US Charts ah pawh number 1 a kai bawk. Zaithiamte duhthusam takin ‘both sides of Atlantic’ ah a rualin number 1 a kai ngat a nih hi, hla theuneu lo tak chu a ni phawt mai.

He hlain a tum ber chu kan sawi tawh ang khan chi leh chi, hnam leh hnam, ram leh ram kara inngeih dial dialna ‘Racial harmony’ a ni. Ebony thing, dum tliang hlarh mai leh ivory (saingho) var tha tak mai piano keyboard a remkhawm a han nih a, rimawi, mawi eltiang, mawi tluan tling tak mai an siam chhuak ang hian hringfa, chi leh hnam hrang hrang, vun rawng inanloh avang te, tihdan leh pianhmang inanloh vang leh thildang dang avang inenhranga inthliar mai lovin, heng kan danglamna te hi kan inlungrualna(racial harmony) leh inpumkhatna(integration) thlentu lo ni zawk hlauh se tih hi a hla phuahtu tum ber leh a thupui chu a ni. Paul McCartney rilru lo hneh (inspire) tu, he hla lo pian chhuahna chu Spike Milligan-a’n piano keyboard a thil dum leh var awmze nei taka inrem fel thlap in rimawi a siam mawi theihzia a sawina ‘Black notes, white notes, and you need to play the two to make harmony, folks,’ ti a a sawi chu a ni.

Keini ho ve thung hi ? Vun rawng lam chu a ni ve chiah lo a nih pawhin he ram zimte, a dung mel 200, a vang lam mel 100 an lo tih thin Mizorama chengte karah hian thingtlang/zokhua leh khawpui mite karah te, chhim leh hmar, chhak leh thlang zawnga kan indeu thin leh hmusit lam rawngkaia kan insawisa thinte hian inlungrualna ‘communal harmony’ lam aiin inthendarhna lam a hawi zawk lo maw? He ram zimtea cheng Mizo fate hi i inenchiang teh ang u tiin he hla hmang hian kan inau a nih hi!!

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy