Site icon The Aizawl Post

I ngaihzawng kha a dating history-a hriattur pawimawh chin a awm

I ngaihzawng kha a dating history-a hriattur pawimawh chin a awm
A hun kaltawh lam chu ngaihtuah vak a ngai lo, kan ti thin. A ngaihzawng hluite pawh hriat kher tum suh te kan ti a, tun hi a pawimawh lai ber chu a ni te pawh kan ti tawh thin. Mahse, kan ngaihzawng te chu kan intawn hmaa inngaihzawnna khawvela a lo tal tawh danah hriat tur pawimawh chin a awm niin relationship lama mithiam ten an sawi.
“History repeat itself” te an lo ti a, chutiang chu inngaihzawnna boruakah pawh thil thleng ve thei a ni tlat mai a, chuvangin kan ngaihzawng te chu a ngaihzawng hluite nena an boruak eng emaw chen hriat ve a thatna a awm a, chu chuan kan pahniha hmalam hun thlengin a hril thei niin an sawi. Hetianga kan sawi avang hian inchhui ruk deuh reuh emaw, in enthlak emaw lam chu a ni chuang lo tih hre hmasa ang aw. Ama hnenah khan tlang takin i zawt mai dawn nia, a nih loh pawhin pehhel deuh a zawh dan pawh a awm ang. Engtiang pawhin zawt la, hriatchhuah i tum tur chu hengte hi an ni-
1. A ngaihzawng hmasa nen eng vanga inthen nge an nih? Ngaihzawng a lo then nual tawh a nih chuan eng nge an inthen chhan ni thin tih hriatchhuah tum rawh. A ngaihzawng then chhan hian eng mi nge a nih tih thui tak a hril niin an sawi a, inngaihzawnna a rilru sukthlek te pawh a hriat theih ang. Entir nan, a ngaihzawng hmasa te nena an inthenna chhan chu nupui/pasal neih a la duh loh vang te a nih chuan, nang pawhin in inngaihzawnnaah khan beiseina neih dan i thiam phah dawn a ni.
2. Engtin nge an inthen thin? Hei hian a thil tum leh a mizia tam tak a tilang ang. Entir nan a ngaihzawng hlui te chu engmah sawi lovin a reh san hmak mai thin em ni? An rilru na taka siamin a then thin em? A ngaihzawng hlui te nen boruak chhe tak neiin an inthen thin em? Heng zawng zawng hi hriatchhuah tum rawh, i hriatchhuah theih chuan ngaihdan thui tak i siam theih phah dawn a ni.
3. A ngaihzawng hluite chanchin engtin nge a sawi thin? A ngaihzawng hluite chanchin i zawhin an chanchin a chhe zawng hlirin a sawi thin em? An pianzia fuh lohna te a sawi chhuak ngai em? A ngaihzawng hlui te chanchin a tha zawngin a sawi thin em? Nge pangngai takin a sawi mai. Hei hian a mizia thui tak a tilang dawn a, nang pawhin engtianga rin tur nge tih i hrethiam thei dawn a ni.

Exit mobile version