Daily Newspaper

I sam a tla nasa em- zunthlum vang a ni thei

41

Sam hian kan taksa hriselna chungchangah thui tak a entir thei niin mithiam ten an sawi. Puitling hrisel tha pangngai chuan sam 80,000 – 1,20,000 vel nei angin an chhut a, dan naranin mihring sam hi ni khatah 0.4mm (thla khatah inch chanve aia tawi) vela thang anga chhut a ni.

Zunthlum (diabetes) chuan kan taksa peng hrang hrang a khawih vek a, tunhma chuan sam leh zunthlum inzawm theih dan hi zirchianna a awm vak lo a, mahse, tunah chuan sam molecular zirchianna an neih atangin zunthlum chuan kan sam thlengin a nghawng tih an hrechhuak tawh a ni.

Zunthlum chuan sam than a ti thu thei a, sam a ti tla nasa duh niin Times of India health section chuan a tarlang. Sam chauh pawh ni lovin hmul thlengin a nghawng thei a, ban leh ke leh taksa peng danga hmul awm te pawh a tla vak thei niin an sawi a, sam leh hmul tla te chu a to leh chhung pawh a rei duh bik niin an tarlang bawk.

I sam a tla vak a nih chuan zunthlum i nei ve tan tihna a ni thei a, a chhan hriat si loh a i sam a tla i buaipui thar ta riau a nih chuan doctor rawn ang che. Chutih rualin diabetologist tam zawk zingah sam tla hi zunthlum lanchhuah hmasak dan a ni tih hrethiam lo an awm niin an tarlang bawk.

French mithiam ten mi 6,00,000-ah zirchianna neiin sam tla leh zunthlum inzawmna a awm leh awm loh an zirbing a, chuta tanga an hmuh dan chuan zunthlum nei zawng zawngin sam tla nasa an buaipui niin an sawi a, an sam tla chu zunthlum an nei tih an inhriat hma atangin an buaipui tawh niin an sawi deuh vek bawk. Chuvangin i sam tla nasa i buaipui a nih chuan doctor rawn kher lo pawhin serum glucose level check ve mai tur a ni. Chutih rualin sam tla zawng zawng zunthlum vang tihna erawh a ni kher lo. Mahse i sam tla chu zunthlum vang a nih chuan blood sugar level control-in enkawl theih a ni a ni a, i zunthlum i control chuan i sam tla pawh a ziaawm ve nghal mai dawn a ni. Hetihrual hian ban leh ke leh taksa peng danga hmul awm tla nasa chu zunthlum bakah thisen luang mumal loh vang te pawh a ni thei a, doctor rawn ngei tur a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy