I tawnah vala lu a hai!

Youth Icon intihsiakna a J Lalrosanga hla chuam, Rosangliana (Zorock) hla ‘Vala Lu A Hai’ tih ngei mai kha show host, Mafeli Hondo hian a inhmeh riau ti an tam tlat. “A sak hming mawi a thang, a sakhmel angel iang, saw le saw le a lo kal, saw a rawn hawi mek e. I tawnah vala lu a hai…A mit a biang a hnar a tung, chawnban a mawi mang e, basam dum, puanchei mawi fual takin a rawn feng leh ta saw…i tawnah vala lu a hai.”
Youth Icon show host Mafeli Hlondo chevelin mipui mit a tlung zo riau a, ‘star-tu’ a ngah tlat. Mafeli hian a tawk a hria, tih te leh ramdanga seilian ni chunga a show kaihhruaina a tawng dang a rawlh tam lo te chuan fak a hlawh a, a chevel hrim hrim hmuhnawm titu an tam tlat.
Mafeli hi show host-ah a mikhual tawh bik lo a, hmanni lawkah Mizorama show ngaihven hlawh berte zinga pakhat Comedian Search hlawhtling takin a host zo hlim deuh hlawt a la ni a, hemi hma hian anmahni buatsaih zaithiam intihsiakna dang ‘Zofa Lelte’ host-in, show dang ‘Seki’ a lo host tawh bawk. Chutihrualin kum dang aia ngaihven rawn hlawh thar leh ta Youth Icon anga show lian erawh a la host bik lo a, tun tumah pawh hian zam leh hlauhthawn aiin a phur zawk niin a sawi a, “A show lenzia leh mipuiin an hlut zia hriat khan min tiphur zawk a ni,” a ti.
He show avanga Mafeli an ngainat thu leh a chevel hmuhnawm an tih thu hi social media lamah pawh hmuh tur a awm nual a, mahse, Mafeli chuan, “Keimah tak hi chuan ka hmu tam ve lo a, mahse, min rawn thawn ve thin,” a ti a, hetianga fakna hrang hrang a dawn te chu, “Han chapo pui a, han inchhuanna tur keimahaah hian ka nei lo em a, theihtawp chhuahna leh Pathian zara lang mawi ve chauh ka ni. Kan hmaa lo ti tawh ka tluk lo nasa a ni,” a ti.
Mizo tawng a hman dan chungchangah Mafeli hi ramdanga a hun tam zawk hmang thin a ni a, 2017-a Mizorama an rawn hawleh atangin pangngai takin Mizo tawng hi a hmang ve leh tan chauh a ni a, a inzir nasat thu sawiin, “Kan tawng (mother tongue) a nih avangin ka ngai hlu a, hman dik leh hman hram hram ka duh a, chu chu kohhran leh khawtlangah pawh kan inzirtirna a ni a, ka nu leh pa ten an ngaipawimawh bawk a. Sap tawnga thumal awm te engtin nge Mizo-in sawidan mawi zawk ang tih thurawn te ka la ve thin. Kum upa lam te ka kawm hnem ve hrim hrim bawk a, an thusawi ka ngaihthlak atang hian a mawi leh tha zawk ka tih te ka lo chhinchhiah thin. Pathianin ka rilruah mahni tawng man chakna leh thiam chakna te pawh min pe a ni ang,” a ti.
Youth Icon show a host chu hahthlak ve deuh chang awm mah se nuam a tih thu sawiin, “Taksa chuan a tuar ve deuh a, ka damlo zeuh zeuh nen, bakah ka aw hi a chak lo lutuk, ka aw hi a chhang zung zung. Mahse, Pathian zarah zaimi te kan lo nih ve naah ka tui a, platform danga ka din aiin nuam ka ti,” a ti bawk.
Mafeli hian Missiology-ah master degree a zo fel chiah a, politics lamah te pawh dai chin lo nei tawh a ni a, engtin nge kal zel a tum tih zawhna chu, “Pathianin min dahna ang ang a kal phawt ka tum. Politics lamah pawh ni se, ‘Hetah hian a ni leh tawh’ A (Pathianin) tih chuan kan kal leh pawh a ngai ang. Mahse, tunah chuan ruahman lawkna a awm rih lo,” a ti.