IAS-a tlin theih loh chhan hi nih tumte mawh a ni ber – MYC chairman

IAS-a tlin theih loh chhan
hi nih tumte mawh a ni ber
– MYC chairman
Mizoram sawrkarin Indian Administrative Service neih tumin sum leh tha sengin hma la thin mah se, tun thlengin sawrkar hmalaknaa inziaktling an la awm lo. Mizoram Youth Commission chairman Malsawmzuala Ralte chuan sawrkar lam atang chuan an theih ang an ti a, tlin theih loh chhan chu nih tumate mawh a ni ber nia a lan thu a sawi.
Zawhna chhangin MYC chairman chuan, sawrkar hmasa hunlai atangin leh tun sawrkarah pawh MYC kaltlangin Mizo thalai zingah IAS neih tumin beih a ni a, Delhi-a coaching academy hmingtha tak hnuaiah sawrkar sensoin kaltir an ni tih a sawi. Academy hotute sawi danin, zawhna tawi chi tamna – prelims exam-ah chuan an titha tlangpui a, zawhna sei chi tamna – mains exam an paltlang hleithei lo tih a sawi.
“Sawrkar chuan a tih theih ang tawk chu a ti, kan tlin theih loh chhan chu, nih tumaten an paltlang thei lo lai hi a ni,” a ti. Hei bakah hian state civil service-ah dinhmun tha tak an chang thei tho chu a chhan pakhat a ni thei tih a sawi bawk.
ZPM a sawrkar hnu ah Mizoram Youth Commission puihna leh hmalakna in thalai 400-in hna an hmu tawh a, a tam zawk hi state pawn leh ram pawna thawk an ni tih MYC chairman hian a sawi a. Hna hmu tam zawk hi MYC leh Honda company-in corporate social responsibility (CSR) hmanga Visan Foundation nen kil thum atanga an thawhhonaa ‘hotel management, food & beverage training’ an buatsaihnaa hmu an ni tih a sawi.
2024- 2025 chhung khan mi 122 leh 2025- 2026 chhungin mi 136-in, a vaiin 258-in 4 star leh 5 star hotel-ah hna an hmu tawh a, hei hi heng zirchhuak thalaiten an duh ber ‘cruise’ a thawhna kalkawng a ni tel tih a sawi a ni.
Heti lam hawi bawk, The Lalit Hotel nen an thawhdunnaah spa therapist 29-in he kum hnih chhung hian hmun hrang hranga anmahni hotel-ah an thawk tawh tih a sawi bawk.
MYC hmalakna in British Army-a lut duh tan dap zel a ni a, mi 6 chu an lut tawh a, tun sawrkar kum chhung hian mi 10 vel chu training tura chhuk thla hman tura ngaih an ni tih a sawi.
Heng bakah hian an thawhpui – Sri City, National Skill Development Corporation International leh TATA Strive nena an thawhhona kaltlangin thalai engemawzat chu thiamna leh tawng zirin India ram chhunga company-ah leh Japan-ah kum upa enkawlin an chhuak tawh a, tawng an zir mek an thiam hunah Germany, Japan leh Taiwan-a hna thawh turin a hmuah an awm nual bawk tih MYC chairman hian a sawi a ni.
Sawrkar hmasa hunlaia ‘Super IAS’ an tih, tuna Mission UPSC an tih kaltlanginarmy officer – lieutenant atanga tan thei tur a inziaktling a, a training mek tih a sawi.
Zawhna chhangin MYC chairman chuan, IAS tling thei turin sawrkar chuan a theih ang chinah a pui a, Delhi-a coaching academy hmingtha tak pawlah a thun a, chuti chung chuan mains an paltlang hleithei lo chu a nih tum – aspirants kuta innghatah a ngai tih a sawi a. Chu chu Delhi-a an cademy belh hote pawhin an hmuh dan a ni tih a sawi.