Daily Newspaper

IAS cadre hran nei turin kan nawr – Chief minister

12

Mizoram-in Indian Administrative Service hran a neih theih nan sawrkar laipui an nawr chhunzawm zel dawn tih chief minister Zoramthanga chuan a sawi.

Mizoram atanga state danga hnathawk, Covid-19 hrileng avanga an hna chan leh harsatna dang avanga Mizorama rawn haw, eizawnna tur nei lote tan Mizoram Youth Commission chuan ruahmanna a siam a. A khuhhawnna hi Thawhlehni khan Aizawlah neih niin, he hun hmanpuitu chief minister chuan Mizo thalaite zingah IAS leh central service danga tling an tlem ta hle chu tan lak ngaihna thil a ni tih a sawi a. India hmarchhakah state mipui nen khaikhina central service-a tling tam ber nih tum turin theihtawp chhuah a, tumruhna leh thahnemngaihna nen kan beih tul a ni tih a sawi. “Mizoram tan IAS cadre hran nei tura sawrkar laipui kan nawr chhunzawm zel dawn a, sawrkarin coaching leh sponsorship programme a kalpui pawh theihtawp chhuah zel a ni dawn,” a ti. Tunlai khawvelah zirna bakah kawng hrang hrangah eizawnna tha a awm thu leh theihtawp chhuahte tan kawng a awm zel thu a sawi bawk.

Nasa taka khawvel chawkbuaitu Covid-19 hrileng vangin Mizoramah pawh harsatna hrang hrang kan tawk tih Zoramthanga hian a sawi a. Mizoram mi state pawna inhlawha eizawng tam tak pawh loh theih lohna avangin an hna atanga thlawn ta, Mizorama lo leta eizawnna bul tan thar a ngai ta chu pawi a tih thu a sawi. Hrileng karah tunah chuan khawvelin damkhawchhuah tumin a bei tih a sawi a. Eizawnna chan ta ten bul an tan thar theihna tura ruahmanna siam a ni chu lawmawm a tih thu leh, hun leh remchanna hmang thiam apiangte chu mi vannei an nih thu te, eizawnna bul tan thar leh turte pawh hlawhtlinna sang zawk an chan theih nan theihtawp chhuah a, remhriatna hmang thiam turin a chah.

MYC chairman Dr Vanlaltanpuia chuan Covid-19 vangin thalai, inhlawhfaa India ram hmun hrang hranga sum leh pai laluttu ni thinte, loh theih loh avanga lo haw te chu bul tan thar lehna tur siam ngei a tul tih a sawi a. State pawn atanga lo hawte list siamin, zirlai ni lo hnathawk, hna chan ta ni 2637 an chhinchhiah a. NEC-ah project an thehluh chu pawmsakin cheng vaibelchhe 3.3 hmanga kawng hrang hranga hma lak tum a ni tih a sawi a ni.

  • He ruahmannain a tum ber chu, eizawnna tana thiamna mamawh inpekna, a taka thawk thei tura exposure pekna, hnathawhna tur infrastructre ruahman leh kaihhruaina tha taka thawk tura ruahmanpuite a ni.
  • District zawng zawnga entrepreneurship development programme kalpui a, hei hi sumdawnna tlanglawn ni lo, mahni kutkea thluak themthiamna hmanga eizawnna tihhmasawnna lam hawi niin, hemi atan hian Planning Department, Commerce & Industries leh MYC tangho kalpui tur a ni. Mi 550 vel he hamthatna chhawr thei tur hi awm tura beisei a ni.
  • LESDE-in an buatsaih tur skill training siam tum a ni a; mi 150 target an ni a, hna rum deuh hlek thawk thei tura ngaihte tana ruahman a ni.
  • Mizoram University Innovation Centre kalpui tur internship cum entrepreneurship skills training buatsaih a ni anga, hemi hnuaiah hian firm hlawhtling tak takah internship kalpui tur niin, an lo rawh zui zel theih nan emaw anmahni kutke ngeia an din theih nan thiamna chherchhuahna tura ruahmanna a ni a, mi 100 tinzawn a ni.
  • Mizoram Food Processing, Research and Training Centre-a kalpui tur training buatsaih tum a ni a, mi 120 tan tinzawn a ni.
  • BPO, animation, gaming, design leh thildanga thawkte migrant worker zingah an tam avangin infrastructure a hranpa tawpa dinna atan cheng nuai 17.5 dah a ni a. Hemi hian mi 637 tinzawnin eizawnna an neih theih rin a ni.
  • Mi 100 tan tour guide ni tura training pek leh mahni inlum atanga sumdawnna e-commerce kalpuite a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy