IAS ni thei tura rin 11 thlang
Super IAS 2023 programme hnuaia Mizoram Youth Commission-in kumin chhunga New Delhi-a MYC full sponsorship hmua foundation course zir tura a thlan mi 11 chu Nilaini khan puan a ni.
MYC chairman Dr Vanlaltanpuia MLA sawi danin, Super IAS 2023 hnuaiah hian exam tuma hming pe 365 an awm a, Exam hi Centres paruk – Aizawl, Lunglei, Siaha, Champhai, Kolasib leh New Delhi ah buatsaihin, July 10 khan screening test neih a ni a, mi 188-in exam hi an hmachhawn a; question paper hi VISION IAS, New Delhi buatsaih niin, exam paper pawh hi an ni hian an en nghal a ni.
Written exam beitute atang hian a titha mi 40 chu personal interview hmachhawn tura koh an ni a, July 18 & 19 khan neih a ni. Hnamdang vekin Mizote nihphung hre sa lo taka an rawn thuai nghal vak chu a dik loa hria in, Interview Board-ah hian Mizo zinga central service thawk lai – Lalramsanga Sailo IRS, Rintei Renthlei IRS leh Elvina Leivon IA&AS te panel chair-ah thu in, VISION IAS atanga expert an rawn tirhte chu interview panel member-ah hman an ni.
Written exam result leh personal interview atanga a titha zual mi 11 chu MYC Super IAS 2023 hnuaia full sponsorship hmua New Delhi-a Coaching Centre-a foundation course kal tura thlan an ni ta tih Dr Vanlaltanpuia hian sawiin, an chhuklam leh course an zawhfel hnua an rawn haw lehna tur thlawhna man, Delhi-a an awm chhunga coaching an kalna man, an awmna man leh ei leh in man an tumsak dawn tih a sawi a. Hemi hma hian intiamna thuthlung ziahtir vek an ni anga, Super IAS 40-a an lo kalpui tawh angin, UPSC Prelims vawi hnih an hmachhawn hma chuan central leh state hnuaia hna dil leh exam phalsak an ni dawn lo tih a sawi.
Tuna thlante hi a buaipuitu VISION IAS-in an laka beiseina awm nia an hriat chin an ni a. Remchang leh lo emaw duh lo emaw pawh awm mah se, midanga hnawhkhah leh theih a ni tawh chuang lo tih tih MYC hotute chuan an sawi a. Delhi-ah hian coaching centre rintlak leh tha ber nia chhal pahnihah a theih ang angin an hauh lawk sa a, a hma thei ang berin an intirh thlak an tum tih an sawi.
IAS ni thei tura rin 11 thlang
