Daily Newspaper

IAS officer hlui Liankunga boral

149

Mizo pa lar, IAS officer hlui Liankunga chu Zirtawpni khan zunthlum natna vangin a boral a, Chaltlang-a an chenna inah Inrinni hian vui a ni ang.

1951-a Khawbel-a piang Liankunga hi thuziak lama inhmang a ni a, a kutchhuakte hi mipuiin an ngaihnawm an tih bakah, Bihar-a a thawh laia Lalu Prasad Yadav-a nena an inzui lai chanchin a ziah te chu Zoram mipuiin an hlimpui hle.

A hna a atanga a chawlh hnuah pawh thuziak lamah a inhmang a, lehkhabu te pawh a ziak a ni. A lehkhabu “Ka Zinkawng Bumboh” tih chu a hun laia lehkhabu hralhtla tak a ni. Social media lama a kutchhuakte pawh miin an chhiar bakah an thehdarh thin.

Govt Aizawl College atanga BA a zir zawhah, chhangchhe berh tak chungin UPSC exam a hmachhawn a, IA&AS-a a tlin hnuah bei tha lehin, 1985-ah IAS a tling ta a ni.

Bihar hmun hrang hrangah a awm kual a, principal secretary/divisional commissioner hna a chelh laiin 2017-ah pension-in a chhuak a ni.

Harsatna paltlanga inzirchhuak a ni a, lehkha a zir theih nan hian puakphur te, kawnglai tein a inhlawh thin. Shillong-a St Edmund’s College-a zir a tum pawh, admission fee a neih loh avangin a hlawhchham a, Shillong-ah hian Assam Rifles-ah clerk hna thawk turin a tling a, kum hnih a thawh hnuah lehkhazir a duh avangin a bang leh. Chumi hnuah Aizawlah a zir zawm ta a ni.

Aizawl College-a a zir lai hian hnathawk chungin a zir a, industry department-a a thawh bakah police-ah tlingin SI a ni thin. Chhun lamah a thawk a, zanah class a kal thin. Accoun & Treasury-ah assistant auditor hna a chelh thin bawk.

Thenrual kawm thiam leh pa nelawm a ni a, mi huaisen leh tumruh, a seh tawh chu seh ngar ngar thin mi a ni. Hun rei tak Mizoram pawnah awm mah se Mizoramah ngainat a hlawh a, a hna atanga chawla Mizorama a awm hnuah pawh mite hriat hlawh leh ngainat a ni.

Amah hi zunthlum natna nei a ni a, kumin April vel atanga a insawisel chu damdawi inah te a lut a, June chawhnu lam atang khan pum nuam lo, taksa chak lo leh khawsik ser ser te a nei a, July ni 7 khan Aizawl Hospital-ah dahluh a ni ta a ni. July ni 28 khan ventilator hmantir a ni a, ni 31 chhunah khawvel a chhuahsan ta a ni. Damdawi ina a awm thu hi social media lamah pawh a darh a, ralkhat atangin a chanchin hi miin an ngaihven deuh thup a ni.

A nupui Zalianthangi nen fa pathum an nei a, tu pali an nei bawk.

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy