Loneituten hlawk zawk leh awmze nei zawka thlai an thar theih nan khawl leh hmanraw dang tihchangtlunna tur hmanrua ngaihtuahsakna tur ruahmanna Indian Council of Agricultural Research, ICAR Research Complex for NEH Region, Mizoram Centre Kolasib bultum Tribal Sub Plan hnuaia neihah loneitu, hnathawhna khawl leh hmanrua dawng tura thlanchhuahte nen Zirtawpni khan hun hman a ni.
He hun hmanpuitu Kolasib district bawrhsap Dr H. Lalthlangliana chuan, taimakna chu tunlai thiamna nena hmankawp chuan hlawkna nasa zawk a awm thin, tiin, “Loneitu taima leh dinchhuah tuma bei tak takte tan ICAR-a mithiamte rawn tur kan nei hi kan nihlawh hle,” a ti. ICAR Kolasib hotute sawi danin, Mizoramah ICAR hmalakna, Gramin Krishi Mausam Seva hnuaiah kuthnathawktu 28971 an awm mek a; thlai, ran vulh leh sangha khawina kawngah zirna hrang hrang kalpui mek a ni. Buhchangphaiah sangha leh vawk vulh kawp hlawk zawka kalpui dan enchhin mek a ni. ICAR chuan kuthnathawktute sum dehchhuahpui dan a ngaihtuahpui tel thin a, kuhva hnah thildang tangkai atana siamna tur khawl pawh pawl hrang hrang hnenah a pechhuak tawh a ni. Hei bakah hian loneitute tan ruahtui khawla hman tangkai dan (rainwater harvesting) kalpui niin Green House sak tanpuinate a pechhuak bawk.
(THE AIZAWL POST – Tualchhung)
Full>> ePaper Subscribe
