Daily Newspaper

Iceland ram football tan Gudjohnsen chhungkua an thawhhlawk kal zel

54

Chelsea leh Barcelona forward hlui Eidur Gudjohnsen kha kan la hria ang a, Iceland men’s national team tana goal khung hnember pakhat zawk niin, international goal 26 nen a chawl a; ram tana inkhelh a bansan hnuah an ram assistant manager hna a chelh mek a, ram tana a thluak a hman mek laiin khelmual chhungah a fapate pahnih Sveinn Aron leh Andri Gudjohnsen-te’n an pa leh an ram tanpuiin goal khung an chhunzawm zel a, Thawhtanni zan World Cup qualifying Group J inkhel pakhata sili faia Liechtenstein an hnehna game-ah pawh Gudjohnsen unau hian an thawhhlawk leh a, ram tana Gudjohnsen chhungkaw hlutna an nemnghet leh.

Eidur khan kum 1996-ah international game 73 khela goal 14 thuntu a pa Arnor thlakin Iceland tana a game hmasaber chu bench atangin a nghakchhuak a, an pafa hian ram tan erawh an kheldun hman ta lo.

Eidur Gudjohnsen-a fate erawh Thawhtanni khan khelmualah ram tan an inlandun a, a upa zawk, kum 23 mi Sveinn Aron chuan minute 65-ah khelmual lutin, a luh lai hian Iceland chuan sihnih faiin hma an hruai mek a; minute 80-ah kum 19 mi, a nau Andri chuan khelhna hun chang ve lehin, Gudjohnsen unau zinga a naupang zawk khelmual luh hma hian Iceland chuan a tumhnihna atan penalty an hmu a, Albert Gudmundsson chuan a chhuih goal.

Hun tawp dawnah Gudjohnsen unau hian inpuitawn chungin Iceland goal lina leh he inkhela goal hnuhnungber ni zui ta an thawkchhuak a; Andri chuan a u Sveinn-a siamsak hmangin a pa hmuh laiin goal a khung.

An kawtkaiah point thum hlawhchhuakin, Gudjohnsen chhungkaw tan lawmna tur awm bawk mah se Iceland erawh team paruk awmna Group J-ah a mawngphah chung chiah luahtu an la ni zui ta zel a, khelh riatah point riat neiin, khelh hnih chiah awm tawhah an tan Qatar rama World Cup khelh phak beiseina chau viau mah se, pahnihna luahtu Romania lakah point rukin an hnufual a, play-off beisei chu bo hlauh erawh a la ni lo!

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy