ICFAI University Mizoram chuan Zirtawpni khan Freshers’ Social 2023 an hmang a, he hun hmanpuitu chief minister Zoramthanga chu tunhnaia Mizoram chhehvela Zofaten harsatna an tawhna kawng hrang hranga a hnathawh that avangin chawimawina thuziak an lo hlan.
Chief minister chuan ICFAI-in campus tha tak a nei chu an vannei hle tih sawiin, Mizorama university din duh institution dang pawh an awm nual a, ICFAI neih ang hmunhma tha an duh ve hle tih a sawi.
India sawrkar leh MNF-in inremna (Peace Accord) an siam khan, university din hi ziah tel a ni, Mizoram University tha tak nei ta a, chutihlaiin Mizoram University pawhin kan mamawhna min dawl zo tawh loa, tihlen zel tumin hma lak mek a ni, tiin a sawi. “University seat mamawhna a san em em laiin ICFAI in rawn lang a, sawrkarin phalna pe in in indin a; kan ramin kan chhawr em em che u a, Mizoram tan in tangkai a ni,” a ti. Mahni state-ah ngei, boruak ralmuang leh zalen taka zir theia an awm chu an vannei hle tih zirlaite hrilhin, tha taka zirchhuak a, hlawhtling tura bei a, chhungkua, ram leh hnam tana mi tangkai nih tum turin a fuih.
ICFAI Mizoram registrar Dr David Lawmzuala sawi danin, New Education Policy zuiin kumin atangin an course structure an thlak vek a; programme course 12 an kalpui mek. Kumin atangin an university-ah hian Ph.D a zir theih tawh dawn a ni.
ICFAI University Mizoram hi Section 4(2) of the Institute of Chartered Financial Anslysts of India University, Mizoram Act 2006, Mizoram Legislative Assembly-in a pass behchhana din a ni a, Chaltlangah mimal in luahin bul an tan a, kum 2011 atangin tuna an awmna Durtlang North-a an campus, ram acre 17.58-a zauah hian an insawn a ni. Tunah zirlai 630 an awm mek a, thawktu assistant professor 28 leh guest lecturer 30 neiin, an zinga zaa 70 hian doctorate degree an nei a ni. Non teaching staff-te nen thawktu mi 92 vel an awm mek.
ICFAI-in Zofate tana hma a lakna vangin CM chawimawi
