ICJ-in tanpuina luhtir turin Israel hrilh

UN top court chuan Israel chu tam tla mai tur dan nan Gaza-ah tanpuina harsatna awm hauh lova a luh a remti tur a ni a ti.
International Court of Justice (ICJ) chuan Israel chuan ‘muangchang’ hauh lovin mamawh ngawih ngawih basic service leh humanitarian assitance te chu thawnluh a remti tur a ni, a ti a.
Israel thung chuan Gaza a tanpuina a luh remti lova puhna chu ‘behchhan awm lova inpuhna’ tiin a sawi ve thung a. Chutih laiin tanpuina Gaza-ah a lut lo zui zel a nih chuan kar khat chhungin tam a tla dawn tia sawi a ni thung.
Court thupek chhangin Israeli foreign ministry chuan Gaza ah ‘lei, boruak leh tuipui’ atanga tanpuina thawnluh a nih theih nan UN leh ram dangte nen hmalakna tharte siamin leh ruahmanna awmsa te tilian zelin hma a la mek tiin a sawi thung.
Gaza a harsatna leh indona thleng chu Hamas te thiltih leh bultan a ni tiin a sawi bawk a.
The Hague a court in thutlukna a siamna chhan hi South Africa in kumin January thlaa Israel chu Gaza a genocidal acts kalpuia puha a khin vang a ni.
ICJ in thupek a siam hi legally binding a ni chungin a taka kalpui turin thuneihna leh theihna a tlachham thung. UN Security Council chu UN body zingah pawh hrekna leh hmalakna tak tak kalpui thei awmchhun a ni chauh thung.
ICJ thutlukna siam hma hian World Food Programme-in a kalpui Integrated Food Security Phase Classification Global Initiative te chuan report kar kaltaa tihchhuahah Gaza-ah chuan chhiatna turu tak thleng reng thei an ti a.
Gaza-a mipui 2.2 million te chuan ei leh bar lamah tlakchhamna nasa tak tawk mekin May thla tawp hmain Gaza hmar lamah chuan tam a tla hman dawn an ti a.
Thupek a chhuahah ICJ te chuan Gaza chuan tam tla hmachhawn mai thei chauh a ni lo va, tam tla a intan der tawh zawk tia sawiin mi 31 lai an zinga naupang 27 te chu malnutrition leh dehydration avangin an thi tawh tiin a sawi.
Court chuan Volker Turk, UN high commissioner for human rights chuan karkaltaa ‘riltamna, tlakchhamna leh tam tla’ te chu Israel-in humanitarian aid pek luh tur khap leh bungrua te thawnluh a khap vang bakah civilian infrastructure a tihchhiat nasat vang a tih chu behchhanah a hmang tel bawk.
Turk chuan tun hnai lawkah pawh Israel chuan Gaza indonaah tam tlaktir chu hmanruaah a hman ni thei ngeia a lan thu sawiin chu chu finfiah a nih chuan war crime a tling tiin a sawi bawk.
ICJ chuan Israel chuan rang takin muang khawchang hauh lovin United Nation be pawpin hma a la nghal tur a ni a ti bawk a. |anpuina zingah eitur, electricity, fuel, shelter leh clothing te bvakah hygine product leh medical supply te chu mamawh hmasak an ni a ti bawk.
Tun hnaiah Egypt lam atanga Gaza luhnaah aid trucks te thui takin tlarin an ding a, Israel chuan endikna khirhkhan zet a kalpui tlat avangin harsatna a siam nasa a ni an ti.
Israel thung chuan Hamas te chuan Gaza a lut tanpuina te chu a tam ber lo hui zelin UN chuan civilian population hnenah tanpuina te chu a semchhuak tha lo a ti bawk.