Ifab lamin throw-in leh goal-kick ennawn mek

Ifab lamin throw-in leh goal-kick ennawn mek
Football dan hi ennawn fo a ni a, a ennawntu leh football bika dan siamtu (football lawmakers) an tihte chu International Football Association Board (Ifab) niin, anni hian vawi duai lo football khelh dan kalphung an lo tidanglam tawh a, tunlai pawh hian tul loa hun a paih dan zirchiang chungin throw-in leh goal-kick bika dan hman lai chu an ennawn leh mek a ni.
  Premier League-ah hian throw-in an tih mai, mual sira ball liam theh ang chi hian chanchin a nei fo tawh a, throw-in bikah pawh ‘long throw’ an tih chu club thenkhatin an hlawkpui lai hmuh tur awm fo tawhin, Stoke City tana theh thui thei tak Rory Delap-a long throw changa striker leh defender rual goal bula intawksir mup mup lai pawh kan lo thlirliam tawh thin a nih kha!
  Tun season Premier League-ah pawh long throw hian sawi a hlawh leh mek a, Brentford Italian right-back Michael Kayode chu long throw hmingthanpuitu hnaivai ber a ni leh mek!
  Goal-kick leh throw-in hi a chak tawh lam tan hun paihna (timewasting) a nih theih avangin Ifab hnuaia Football and Technical Advisory Panels (FAP-TAP) chuan Thawhlehni khan he mi chungchangah hian thuchhuah siamin, football dan hman mek dang pawh an khawih tel a, yellow card vawi hnih hmuh vanga hnawhchhuah an awm a nih chuan video assistant referee (VAR) kaltlanga player chet dan ennawn rawtna pawh an pawmui bawk.
Corner pek dik loh hrinchhuah nia ngaih theih avanga goal a luhin VAR review kalpui rawtna a awm bawk a, chu erawh hnawl a ni thung.
Tarlan tak angin, tun season Premier League-ah long throw chungchangin sawi a hlawh a, hun paihna chi khat a nih dan a langsar a; tin, goalkeeper-te’n ball an petchhuah dawnah goal-kick kaltlanga hun an paih theih dan pawhin mi mit a tikham a, Ifab lamin ennawn tura an zirchian zingah a tel chho leh ta a ni.
Tarlan tawh thin angin, Ifab hian football dan a siamthar bakah a awmsa a tidanglam fo a; kumin pawh hian goalkeeper-te zawm tur dan thar tichhuakin, keeper chuan inkhel tluang lai (open play)-ah ball a chhuah hmain second riat thleng bak a kutin ball a keng thiang lo tih a ni.
Second nga a ken tlin rualin referee-in goalkeeper chu ball thlah a hun hnai tih a hriattir ang a, second riat a ken pelh hlauh chuan corner a chawi ang.
Karliamta Inrinni pawh khan an mikhual Liverpool laka 3-2-a an chakna inkhel hun pek belh tawp dawnah hun khawhralna atan Brentford goalkeeper Caoimhin Kelleher chuan second 13 lai a kutin ball a keng a, corner hmanga hrem a ni.
FAP-TAP hi kumtin dan nnawn ngai a awm em tih ngaihtuah turin October thla hian an thukhawm ziah thin a; he pawlah hian referee, coach leh player-te zinga an hun laia langsar chin thah an tel thin a, tunah hian Arsene Wenger, Luis Figo leh Pierluigi Collina-te chu a langsar zual an ni.