Site icon The Aizawl Post

IFPI Global Recording Artist of the Year- Taylor Swift

Khawvel huapa recorded music industry-a a khaikhawmtu pawl IFPI (International Federation of the Phonographic Industry) chuan 2022 Global Recording Artist of the Year Award dawngtu chu Taylor Swift a nih thu an puang a, Taylor Swift hian he award hi tum thum a dawnna niin, ani aia dawng ngun an la awm lo. Swift hian he award hi 2014 leh 2019-ah te pawh khan a lo dawng tawh a, ani hi he award tum thum dawng thei awm chhun a la ni. Swift dawta e award dawng ngun chu Drake leh BTS niin, tum hnih ve ve an dawng tawh.
He award hian ngaihhlut a hlawh a, zaithiam ten kum khat chhunga khawvel huapa an album leh hla, digital leh physical-a an hralh tam dan te, streams atanga vinyl thlengin a huam a, he award dawngtu hi chu kum khat chhunga khawvela album leh hla hralh tha ber tihna a ni ber mai.
Global Artist chart-ah hian BTS chu No.2 niin, anni hi kum thum chhung a zawnin chart top 3-ah an awm tawh a, 2020 leh 2021-ah No.1 an ni a, 2022-ah No.2 an ni. Drake chu No.3 niin, ani pawh he chart top 3-a tum nga a lanna a ni tawh bawk.
IFPI Chief Executive, Frances Moore chuan, “Taylor Swift hnena IFPI Global Recording Artist Award a tum thum nana kan hlan thei hi a nuamin a ropui hle a ni. Taylor hi international star duhawm tak a ni chiang a, khawvel hmun tina a fan-te nena inzawmna tha leh nghet zawk nei turin artist anga thangin, a inher rem thiam a ni,” a ti.
Puerto Rican superstar Bad Bunny chu ranking-ah No.4 a ni a, ani hi Latin America atanga top 5-a lang thei hmasa ber a ni a, Spanish deuh vek hla nei zinga a thleng sang ber a la ni bawk.
No.9-ah Jay Chou a lang a, ani hi Taiwanese artist zinga he chart-a lang thei hmasa ber a ni a, China leh South-East Asia lama a larna avanga he ranking-a lang thei hi a ni. South Korean act lam pawh an che tha viau a, BTS bakah SEVENTEEN chu No.6 niin, Stray Kids chu No.7 an ni bawk a, ram pakhat atanga top 10-a lang thei ngah ber an ni.
Top 20 Global Recording Artist Chart 2022
1. Taylor Swift
2. BTS
3. Drake
4. Bad Bunny
5. The Weeknd
6. SEVENTEEN
7. Stray Kids
8. Harry Styles
9. Jay Chou
10. Ed Sheeran
11. Eminem
12. Kanye West
13. YoungBoy Never Broke Again
14. Kendrick Lamar
15. Lil Baby
16. Billie Eilish
17. Post Malone
18. Juice WRLD
19. The Beatles
20. Imagine Dragons

Exit mobile version