Site icon The Aizawl Post

IIM zirlaiten CM kawm

Mizorama cham mek Indian Institute of Management (IIM) – Rohtak zirlai rualte chuan Ningani khan chief minister Zoramthanga an kawm.
IIM-Rohtak atang hian zirlai leh anmahni hruaitu nen an vaiin mi 42 chuan Mizoram an rawn tlawh a; mipui khawsak zia leh ei leh bar dinhmun bakah hnam ziarang zirchiang tura lokal an ni.
Chief minister chuan Mizoram state history, harsatna nasa tak paltlanga state-in vawiin a thlen chhoh dan leh economy hmasawnna kawng zawh dan te a lo sawipui a, zirlaite zawhna a chhang bawk.
IIM-Rohtak director Prof. Dheeraj P Sharma chuan zirlaite hi hoin, an campus-a course hrang hrang awmte sawiin, Mizo zirlaite zingah zirna sang zawk an institution-a an beih a beiseipui thu chief minister hi a hrilh.
India hmarchhak state leh state danga awmte kara inhriatchianna leh inpawhna thuk zawk siam turin zirlaite tan sawrkar laipui chuan Ek Bharat Shreshtha Bharat a duang a. He programme hnuaiah hian activity hrang hrang a awm. Hemi hnuaiah hian Mizoram thalai leh IIM-Rohtak thalaite hi intlawhtawnin, tunah hian IIM-Rohtak tlawha cham mek Mizoram college zirlai engemawzat an awm a ni.

Exit mobile version