Daily Newspaper

ILP ve thung

9

Ramdang mi, an Visa tawp hnua India rama la chamte chhui leh chhinchhiah tura sawrkar laipui Ministry of Home Affairs-in September ni 29-a hriattirna a tihchhuah dungzuiin, Mizoram sawrkar pawhin Task Force for Immigration Check Posts (ICPs) chu DIG Police (Crime) kaihhruaina hnuaiah a din a. Hetah hian Sr. SP/FRO, CID(SB); District SP/FRO zawng zawng te; State Informatics Officer (NIC); Deputy SP CID(SB) leh Zorinpui, Kawrpuichhuah leh Zokhawthar ICP-a Officer-in-charge te chu Member-a ruat theuh an ni.

Mizoram hi ramdang pahnih karcheha awm kan nih avangin sawrkar laipuiin a rawn ngaimawh ang hi tihmakmawh a ni a. A nihna takah chuan, hetianga sawrkar laipuiin a rawn hriattir hma pawha mahni thua lo kalpui daih tawh awm tak a nihna chin pawh a awm awm e. Hei hi ram himna atana thil pawimawh tak a ni.

Hetih lai hian, ILP kan buaipui danah pawh hian inenfiahna tur a awmin a rinawm. Temporary ILP pekchhuah umzui kawngah hian kan muthlu thin deuh niin a lang a, a chhan pawh tlawmngai pawl thenkhatin an mit a kham huna ILP an han check nikhua hian, ILP fel lo chunga Mizorama chambang hi thahnem tak manchhuah tur an nei deuh zel a; man chhuah loh pawh tam tak an awm thin ang tih a rinawm bawk.

Tun dinhmunah, ILP fel lo chunga Mizorama chambang an tam theihna chhan hi chu, kan system a la fel loh vang niin a lang. Temporary ILP latute hian Mizoram chhunga an lo luh hnuah, an awmna tur district theuhah an tifel tur a ni a. Chutah chuan a sponsor-tute pawhin mawhphurhna an nei tel a. Hetah hian, engvanga ILP tifel lova Mizorama chambang kual ta mai mai thei nge an nih tih hi zawhna chu a ni ta a ni.

Temporary ILP holder-te hi an awm duhna district-a an in-report leh report loh hriat chat chat theihna turin system hi a fel lo niin a lang a. Temporary ILP holder-te an in-report loha chhui zui theihna turin contact nambar a awm vek tur a ni a. Chutianga contract theih lohva an awm chu thil thiang lo a ni. Hemi kawngah hian ILP pekchhuahna leh a lo dawngsawng turte inkungkaihna hi thil pawimawh tak a ni a, helaiah hian enfel ngai leh siamthat ngai a awm niin a lang. Hei hi a fel a, tha taka bawhzui a nih chuan, office atang pawhin ILP fel lo te chu an koh nalh nalh theih ang a, khawlaia ILP check vak vaka buai pawh hi ngai lo tura ngaih a ni.

Tuna sawrkar laipuiin Immigration Check Posts atana Task Force din tura a rawn hriattirna kan lo ngai pawimawh ang bawk hian, ILP chungchang pawh hi tun ai hian ngai pawimawh thei ila chuan, khawlaia ILP nei lo check-a tlawmngai pawlte an vah dul dul hi a ngai lo tura ngaih a ni.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy