Daily Newspaper

IMAGINE THERE’S NO LENNON

7

Ramhluna Hnamte

The Beatles member zinga an khaipa deuh ber John Lennon kha ni 8.12.1980 khan amah atchiltu David Chapman khan a New York apartment bulah a nupui nen hlim tak a an zan leng haw kha a lo kaphlum ta kha a ni a. Kumin December ni 8 hi a thih champhaphak vawi 40-na a lo ni ta reng mai. Khawthlang lam a amah ngaisangtute chuan he hun hi urhsun takin an hmang leh ngei ang. John Lennon hian ngaisangtu a ngah hle a, a la ngah hle zel bawk. Khatia Chapman-a’n a lo kaphlum ta mai kha a pawi a, a pawi thui turzia a hre lo a ni. Chapman khan tual a that a ni naran mai lo a, ‘Rimawi’ a that tel a ni.

Seventies khan American zaithiam leh hlaphuahthiam Don McLean chuan ‘American Pie’ hla kha namen lovin a rawn lar pui a. He hlaah hian fifties leh sixties lai a rock star lar chung chuang tak Buddy Holly leh a thiante an tour neih lai a thlawhna chesual a an thih thu a tarlang a. Ni 3.2.1959 khan an lar vanglai takin Buddy Holly, J.P.Richardson leh Ritchie Valens te chu thlawhna chesualah an thi a, chu an thih ni chu Don McLean hian ‘Rimawi vuiliam ni’ (The day the music died) tiin hlain a au chhuahpui hial a. Heng zaithiamte thih atanga kum 21 pelh hretah Rock n Roll khawvel rawn chawk danglam vek a rock music chithar rawn siamtu the Beatles khaipa leh thluak bur ber John Lennon chu vuiliam a lo ni ve ta a nih kha. Chu ni anchhedawng chu December ni 8.1980 kha a ni. Tunah kum 40 zet a lo liam leh ta. Kum chuti zat chu liam tawh mahse amah leh a rimawi ngaisangtu tam tak zingah John Lennon hi a la nung reng a, a la vul zel mai. Ni 9.10.1940 a piang Lennon hi a thih hian kum 40 leh thla 2 a ni chiah. Min la dam pui ni se kum 80 val a ni ve tawh ang a, rimawi lipuiah a la chhek barh barhin ka ring, anni ho chuan rimawi hi an upat san ve thei lo a, an MUP san thei hlei thei thin lo. Don McLean-a’n Feb ni 3,1959 chu rimawi vuiliam niah lo puang tawh mahse thangthar, Beatles music tui pui a, an vanglai lo hre pha tawhte tan chuan December ni 8,1980 kha ‘The Day the Music Died’ kan lo tih ve thin chu a ni ta ber zawk awm e.

Lennon hi la dam ve ta reng se, kan sawi tawh ang khan kum 80 chu a ni tawh ngei ang, zaiin zuang lim peih tawh lo mahse hla erawh chu a va phuah belh hnem tawh dawn em! Rimawi hi a chawlhsan mai a rinawm si loh a, hla thar zir tlak leh belhchian dawl tam tak zawng a piang belh ngei ang, mahse kum 40 liam ta khan chu chu tih tawp a ni ta si, rimawi khawvel hian a chan ropui tak zet a ni.

John Lennon khan a dam lai khan Elvis Presley kha a ngaisangin a dah pawimawh thiam em em thin a, ‘Elvis Presley kha chu lo piang lo se, Beatles hi kan awm lovang’ a ti tthin. A dik ang, mahse Lennon hi piang ta lo se the Beatles kha an awm bik kher lo maithei, third millennium kan tih thleng pawh a chul thei lo the Beatles music pawh hi a piang bik kher lo mai thei bawk, tun lai rock music kan tih pawh hi a piang ngut ang em le?. Chuvangin kan thupuiah pawh ‘Imagine there’s no Lennon…’kan ti a nih hi, ngaihtuah ti thui thei deuh a sin.

Khatia an lo lar tak viauah khan ‘Isua aiin kan lar tawh zawk’ a han tih hlauh mai pek a, an chhiat phah nasa teuh kher mai. Radio station hrang hrang atangin an hla tih chhuah an ti tawp nghal a, an fans te pawh in an record an paih kehin an hal chum chum a, John Lennon leh Beatles ho an huatzia an au chhuahpui chuah chuah mai a nih kha. An thupha chawina kha an pawm sak leh ta a ni ang e, a hnu lawkah an rawn ding chhuak leh ta mai bawk a. Roman Catholic kohhran phei chuan an la lungrun hle a, hetiang thu lelo an chhakchhuah hnu kum 40 dawnah an ngaihdamna thu Vatican-in an ti chhuak chauh nghe nghe a nih kha. Mahse hemi tuma Lennon-a tawngkam hian Pathian pawi a sawi em ni tih ngaihbel theih turin khatia Rock band ropui leh lar em em kha an vanglai takin an keh darh ta thut a, inzawmkhawm leh thei miah lovin an darh ta a nih kha. Ngaihbel tur ting bawkin a nun pawhin a tawi phah ta te pawh a ang hle, a pawi khawp mai.

Beatles member tin te kha an lar tlang hle nain Lennon leh McCartney te hi an lar fal deuh a, hla an phuah thiam a, an zaitu berte an ni ve ve a, an hun lai na na na kha chuan nupui turte chu duh an thing thei tih a chiang khawp. mahse mak tak maiin nuthlawi ve ve an nei a, Lennon-a nupui Yoko phei chu Japanese-ah pawh nu hmeltha lem lo tak, pianhmang mawina em em pawh nei bik lo kha a nia. Mahse a pasal Lennon khan a hmangaihin a chawimawi thiam ngawt thin mai. A nupui hming pawh kha a chawi lar thiam bawk. A hming John Winston Lennon ni mahse a chang chuan John Ono Lennon te a han inti thul, a band hmingah lah Plastic Ono Band te a han ti bawk. Yoko Ono tan chuan a lawmawm ngawt thin ang.

Kum 40 liam ta, December ni 8,1980 khan Leitlangpuiah ka awm a. Khatih lai khan Lunglei chu sawi loh Aizawlah pawh TV nei an la tam lo hle, colour TV ngat phei chu ‘Chumi te chuan an nei’ kan la ti thei nalh nalh a nih kha. Cable TV te phei chu a rim a ra kan la hre lo a, Bangla Desh TV leh Doordarshan TV fiah vak lo in, a antenna her fo ngaiin kan en thin a nih kha. Hemi zan hian Lungleia Pu RTP inah Bangla Desh TV atangin fiah vak loin John Lennon kahhlum a nih thu leh Yoko tap lai te leh fans te an rawn ti lang zuai zuai a, chu chu kan hmuh leh hriat theih chhun chu a ni mai. Tunlai ang in internet lam a han chhut zui theih lah a ni silo, chanchin dang hriat zui chak tak khan ui tak leh hrilhai takin kan kun tlawk tlawk mai a ni e. Chuta tanga kum 40 chu a lo ni ta reng mai!Lennon leh a music uitu te chuan an uina a la zual zel si. John Lennon te ang music tak tak siam chhuak thintu hi khawvel a hmeichhe tam tak lo piang chhuak tawhte hian an hring zen zen lova, an hring leh tawh pawh in a rinawm loh a nih hi!

Tunlai khawvel mangan thlak tak, Terrorist ho tualchaina hmun leh hunah hian remna duhmi Lennon-a te hi an ngaihawm zual thin, a ni kha chuan Remna leh Rimawi kha a thupui ber a ni thin a, ‘Give Peace a Chance’ ti lawm lawm chung a a dam chhung hun tam zawk hmang thintu kha a ni si a. Min la dam pui nise tunlai khawvel buai leh chhe tawh tak tan hian remna hla engzat tak phuah chhuak leh tawh ang maw. Mi tam takin an sawisel thin a hla hit ropui ‘Imagine’ te pawh hi han zir chian chuan Pathian awmloh zia lam aimah in khawvel a remna len tir a duh zia tih lanna hi a ni mah zawk in a lang a. Sakhaw biak inan loh vang a in nghirnghona te, ram leh ram in taina leh in erna, hringnun hrim hrim a in huatna sual awmte bo tur a a duh zia a auchhuah puina a ni ber zawk in a lang a nih hi mawle.

Lennon-a thih hnu lawk hian a thih hma a a album released a hlate chu a lar zual sauh a. A dam lai a charts thleng sang tak, tlak hniam lam pan leh tawhte pawh a number 1 han kai thar leh ta te pawh an awm a ni. January ni 10,1981 hnu khan a records te hralh a kal nasa leh zual a. Krismas hnu lawk ni mahse a hlate ‘Happy Christmas(War is Over)’, ‘Imagine’ leh ‘(Just Like) Starting Over’ te chu British Charts ah Top 5 ah an awm vek a ni. Hetih lai vek hian a album hnuhnung ber ‘Double Fantasy’ pawh album charts ah number 2 a ni bawk. Imagine album pawh charts ah number 39-na a rawn kai chho leh dawrh a, an hla hlui ‘The Beatles 1962-1966’ album pawh charts ah number 58 na a rawn ni chho leh bawk. 1981 February thla tir lamah khan Lennon-a hla 5 zet chu Top 40 ah an lang a, heng zingah hian ‘Give Peace A Chance’ pawh a tel nghe nghe. Album lamah pawh Lennon-a album 3 te chu Top 15 ah an tel a, Beatles album 2 pawh Top 75 ah an lang thar leh bawk. Beatles hla hrim hrim a lar zual leh phah a, Lennon-a phuah ‘Jealous Guy’ chu March ni 14,1981 ah Roxy Music in British charts ah kar 2 chhung number 1 an nih pui a, John Lennon/Elton John Live Duet Single ‘I Saw Her Standing There’ pawh charts ah a rawn lang nawlh bawk. Heng zawng zawng hi Lennon-a thih zara rawn lar thar leh, Lennon-a thih malsawmna niin a lang

Engpawh nise kum 40 chauh he Planet a cham chhung in John Lennon hian rimawi khawvelah thawm a nei lian hle a, rimawi lamah ro tling min hnutchhiah hi a ropui tak zet a, a thih champhaphak vawi 40-na ah hian a pualin hun kan hmang a ni e. John Lennon te ang mihring hi chu an vang a, an hlu chung chuang hle a nih hi! Imagine if there’s no LENNON!!
‘Imagine no possessions, I wonder if you can,
No need for greed or hunger,a brotherhood of man;
Imagine all the people sharing all the world.’
– John Lennon(circa 1970)

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy