Site icon The Aizawl Post

In chim hnuaiah a fa sen nen darkar 90 tangkhang

Lirnghing na takin Turkey leh Syria a nuai atangin kar khat a liam ta a, mi sang tam takin nunna an chan a. Beidawnna tawp khawkin ro a rel mek laiin ‘thil mak’ thleng erawh hmuh tur leh hriat tur a awm chamchi ve tho va, chung zinga pakhat chu hei hi a ni.
Necla Camuz chuan 27 January khan a fapa pahnihna tur a nei a, a hmingah Yagiz ‘huaisen’ tih a sa a.
Ni 10 a ral chauh tihah local time 04:17 ah Necla chuan southern Turkey-a Hatay province-a an chenna Inah chuan thochhuakin a fapa chu hnute a pe a. Chutih lai tak chuan lirnghing avangin mit khap kar lekah hnawmhnawk karah phumin an awm zui a ni.
Necla leh an chhungkua chu Samandag-a tunlai in sak building chhawng ngaa chhawng hnihnaah an cheng a, building tha tak a ni a, kan him viauin ka inngai tiin a sawi.
Khami ni zing khan lirnghing avangin an chehhvel chu nuai chhiata awmin khawi hmunah pawh building te chu a tlusawp niai nuai dawn tih a hre hauh lo.
“Lir a nghin tirh khan room danga ka fapa upa zawk nena awm ka pasal bul pan ka duh a, ani pawhin min pan a tum ve tho” tiin a sawi a. “Kan room a lokal an tum laiin wardrobe tlu in a danga kal ngaihna a awm lo zui a ni,” a ti a.
“Lirnghing a na tial tial a, bang a chim a, room a nghing a, building chu a inthlak danglam a. Lirnghing a reh meuh chuan a chhawng hnuai zawkah kan awm ta daih tih pawh ka hre mai lo. Ka chhung te ka ko va, mahse, min chhang lo,” a ti.
Kum 33-a upa Necla Camuz chuan a awmah a fa sen chu a pawm a, a bul lawka wardrobe tlu chuan concrete slab chimin a delh tur chu dangin an nufa chuan a chhanhim zawk a ni. Chuta chep taka an awmnaah chuan an nufa chuan ni li zet chesawn lovin an awm zui a ni.

Ni khatna
Hnawmhnawk karah pyjama a hak nen Necla chuan engmah hmuh theih a nei lo va a thim bur thu a sawi a. A ngaihtuhana te hmangin thil awm dan chu hriatfiah tumin a chhut a.
A fa Yagiz chu nung damin a la thaw tih a hria a, a khuk nasat em avangin a tirah chuan thawk lak mai a hars a, mahse, rei lo te hnuah chuan hnawmhnawk karah a taksa lum hmang chuan a tilum a.
A bul lawkah chuan naupang toys a awm tih a hria a, mahse chung te la tur pawhin chet ngaihna a awm lo va, a awm dan siam rema nuam zawka awm tur pawhin insiamthat ngaihna a awm chuang lo.
Hla takah aw a hria a, au vaka wardrobe bang bengin chet a la a. “Awm in awm em? Min hre thei em?” tiin a au a.
Mahse, chu chuan awmzia a nei lo, a bul lawka hnawmhnawk awm te chu lain wardrobe vuak nan chuan a hmang a, a ring thei ang bera thawm siam a tum a, mahse, chhangtu an awm chuang lo. Necla chuan amah chhanchhuaktu an awm dawn lovah a ngaih thu sawiin ‘ka mangang tak zet’ tiin a sawi.

Lei hnuai nun
Hnawmhnawk kara thim chhah mup bawk hnuaiah chuan Necla chuan hun a hrethiam tawh lo. Chung te chu a nun hman dan tura a hisap ang a ni lo.
“Naute i neih chuan thil tam tak i ruahman a ni, thawklehkhatah hnawmhnawk thim karah i awm bawk si,” tiin a sawi a.
Mahse, a fa Yagiz chu duat taka a enkawl a ngai tih a hria a, an tawmna chep zetah chuan hnute a pe a. Eitur emaw tui intur a awm lo va, mangan thilah ama hnute ngei chu in tumin chet a la a.
Necla chuan a chung zawna thil verh thawm a hria a, ke pen thawm leh aw ri pawh a hria a, mahse, hla taka mi ang maiin a chuai raih raih a. Pawn lam atanga chhanchhuaktute an lo hnaih deuh nia a hriata lo auh nan a aw te chu hman rih loh a thlang zui a.
A tawmnaah chuan che thei lovin a chhungte a ngaihtuah neuh neuh a, a awmah a fa sen chu a pawm a, khawiah emaw chuan a pasal leh fapa te chu an awm dawn tih a hria. Engtiangin nge an awm ang aw tiin a suangtuah a.
Necla chuan dama a awmna chu a chhuahsan a ring hauh lo, mahse, Yagiz awm ve chuan beiseina erawh a pe tlat thung a. A fa chu a mu chiah chiah reng a, a harhin a tap a, a mut leh thlengin a hnute a pe a.

Chhanchhuahna
Lei hnuaiah darkar 90 chuang an awm hnuah Necla chuan ui bauh ri a hria a, a mumang emaw a ti. Ui bauh chu aw riin a zui a.
“I tha em? I that chuan min chhang rawh? Khawi apartment ah nge i awm?” tia authawm a hria a; hmuhin a awm ta.
Rescuer te chuan fimkhur takin a awmna thlen tumin an lai a, thim chhah mup chu torchlight engin a thlak a, a mitah tak enin a awm.
Istanbul Municipality Fire Department rescue team tena an chhanchhuah chuan Yagiz chu engtia upa nge tia an zawh chuan Necla chuan a chhang thei lo. Lirnghin hma in ni 10 a upa a ni tih chauh a hria.
Recuer tena Yagiz an lak hnuah Necla chu stretcher hmangin mipui thahnem tak pungkhawm te awmnaah nawr a ni a, tute mah hriat a nei lo. Ambulance-ah dah zui niin chutah chuan a fapa pawh a him leh nungdama a awm thu hrilh a ni.

A hnu zelah
Damdawi in a thlen hnuah Necla chuan a chhung ten an lo hmuak a, kum ruk lai a neih tawh a pasal Irfan leh a fapa kum thuma upa Yigit Kerim te pawh chhanchhuaha awm zingah an tel.
Adana province a hospital-ah dah an ni a, a pasal leh fate chuan hliam tenau chauh an nei hlauh bawk. Vanneihthlak takin Necla leh Yagiz te chuan hliam na an nei lo va, darkar 24 damdawi Ina enthlak an nih hnuah chhuah zalenin an awm.
Necla chuan hawna tur chenna In a nei lo va, mahse, an chhung te chuan puan in kaihchawpah an hruai lut a, chutah chuan mi 13 lai an cheng mek bawk. Chhungkua ngang an ni a, inpui tawnin a rem dan danin an cheng rih tawp mai a ni.
Necla chuan thil thleng a chhut letin a fa Yagiz chu a nun chhanhimtu a nih thu sawiin, “ka fa hi dama min siamtu a ni a, amah awm lo se ka dam lovang” tiin a sawi a, chakna petu a nih thu a sawi.
A fapa chuan an thil tawn ang chu a nunah a tawn ngai loh a duhsak ber thu a sawi bawk a. “Nausen mai a ni a, engmah a hre lo hi ka lawm a ni,” tiin a sawi.
A pa Irfan pawh chuan a fa Yagiz chu lungchim taka enin, “Ka fapa i dam maw?” a ti sep a.

Exit mobile version