Hlimen, Melthum Silai Mual leh Bawngkawn Vengtharah a vaia belhkhawmin chenna in 57 chu chhiatna thleng mai thei nia ngaih a nih avangin Aizawl district thuneituten chhuahsan rih turin a luahtute an hriattir.
Tunhnaia Cyclone Remal thawkah Aizawl district chu Mizoramah a tuar na ber pawl niin, chhawmdawlna leh chhanchhuah hna pawh thawh mek zel a la ni a. Mithiamten hmun hlauhawm zual nia hriatte endikin, ruahtui tam zawk a tlak zel chuan him lo thei nia an hriat chu chhuahsan rih tulin an hria a ni.
Hemi bawhzui hian District Disaster Management Authority Aizawl chairman, bawrhsap Nazuk Kumar chuan Section 30 (2)(iii) of the Disaster Management Act 2005-in thuneihna a pek angin, May 28-a Hlimena chhiatna thlenna bulhnaia in ding 46 (list awm) a chengte chu ruah a sur zel chuan a hlauhawm theih dawn avangin, heng ina chengte hi thu leh awm hma chu an in chhuahsan rih turin a ti.
May 28-a Melthuma chhiatna thlenna bulhnaia in ding pathuma chengte leh, Trinity Hospital Melthum (Silaimual) bula in ding, RCC building pakhat leh Assam type pahnih, link road an lam ami chu ruahtui tam zawk a tlak zel chuan him lo theia ngaih a nih avangin, Melthum huamchhunga awm heng in paruka chengte chu thu leh awm hma an awmna hi chhuahsan rih tura tih an ni.
EGS Link Road Bungkawn Vengthar-a in ding 5 pawh ruah a sur zel chuan a hlauhawm theih dawn avangin, heng ina chengte hi thuleh awm hma chu an in chhuahsan rih turin a ti a ni bawk.
In hlauhawm zual 57 chhuahsan rih turin DDMA Aizawl-in hrilh
