Ngaihzawng i then ngun ta riau em? Hlim takin bul intan a, mahse, a daih rei lo, in inthen leh ringawt mai thin! Hetianga ngaihzawng i then deuh sekna chhan hi i ngaihzawng te dik loh leh thiam lohah i puh rilru deuh mai thei, mahse, ngaihtuah chiang teh, nangmah vang kha a ni zawk thei tlat mai.
In ingaihzawnnaah harsatna thlentu leh in inthenna chhan, buaina thlentu chu nangmah kha i ni zawk thei tlat. Relationship lama mithiam te chuan kan mizia leh nundan, kan khawsak phung leh chetdan atangin ngaihzawng nei rei thei lo tur chi kan awm niin an sawi a, chutiang, inngaihzawnnaa harsatna leh buaina thlen tam thin an tih ang chi te chu kan rawn tarlang e.
Inngaihzawnnaah hian i tih dan tur leh awmdan tur, i ngaihdan tur zawng zawng nena hriat lawk vek theih i nih chuan a fuh lohna chen a awm a, chutihrualin, hriat lawk harsa lutuk nih pawh kha a fuh leh chuang lo. Eng emaw thilah i ngaihdan tur leh i awmdan tur i ngaihzawng/ kawppuiin hriatthiam harsa a tih a, engtin nge i ngaih dan ti a rilru thlaphang taka a awm a ngaih fo mai chuan a fuh lo. Tihsual palh leh dai pelh palh hlau reng reng nun a neih phah dawn a. Thil thenkhat chu i ngai hoin, i ngaizam viau a, chutih laiin thenkhatah rin loh takin i thinrim leh vak thin lawi si a. Khatiang mizia kha ngaihzawng te nena inthen duh chi mizia a ni.
I duhdan a engkim kalpui vek tum chi i nih chuan ngaihzawng i then fo ang. Han inngaihtuah vang vang teh, eng emaw in tih dawnah khan, in tih tur chu a boruak a lian emaw a tê emaw pawh ni se, i duhdan tih zel kha i duh deuh kher thin em? Thutlukna siam dawna mahni thu thu a engkim titlang chi kan nih chuan ngaihzawng kan nei rei hleithei lo ang.
Thuruk ngah lutuk, kawppui te laka zepruk leh thup ngah lutuk ang chi hian ngaihzawng an nei rei thei meuh lo. Chutihrualin, a engamah hmaa ngaihzawng te ring zo lo nghal em em ringawt mai te pawhin ngaihzawng an nei rei thei mang tlat lo.
In inkar buaina kha nangmah vang a ni em?
