June 23 zan khan Lawngtlaiah chenna in pakhat a kang a, he ina cheng mi pahnih an kanghlum. Sawrkar chuan Chief Minister Relief Fund atangin Rs. 25000 ve ve in a ral dawn.
Thudawn danin Lawngtlai Vengpuia Thangnawna (L) in, Assam type chu Pathianni zan dar 9.00 vel khan a kang a, thenawm hnai leh khawtlang an tlankhawm nghal bakah Fire & Emergency Services lam pawh hriattir nghal ni mah se, kangmei hi a nasat tawh vangin in neitunu Sungtiali (76) w/o Thangnawna (L) leh Thangnawna (L) farnu Darhliangi (70) chu chhanchhuah theih an ni loa, nunna an chan. An chenpui dang pakhat, mipa chu tukverhah zuangchhuakin a him. Lawngtlaiah hian Inrinni zan khan power supply a awm lo a, kangmei hi mombati chhit atanga chhuak niin khawtlang hruaitute chuan an ngai a ni.
In kanna hmun hi a zan la la in Lawngtlai East bialtu MLA Dr Lorrain Lalpekliana Chinzah, Lai Autonomous District Council CEM mawhphurhna la mektu Lalropuia Chinzah bakah Lawngtlai DC office atangin official-ten an tlawh nghal a, bialtu MDC VL Hmuaka chuan thutchilhin, Thawhtanni zing khan Lawngtlai West bialtu MLA C Ngunlianchunga pawhin a tlawh a. Chhawmdawlna hrang hrang an hlan a ni.
Chief minister Lalduhoma chuan he chhiatnaa nunna chan te hi CMRF atangin Rs. 25000 ve ve in ral an dawn tih a sawi.
In kangah pahnih thi Sawrkarin a ral dawn
