In sak buaipui chhung rei lutuk hi kan siamtha ang – Lalnghinglova Hmar

Aizawl Municipal huamchhunga in sak buaipui chhung rei lutuk chu Building Regulation 2007 ennawnin a tul angin an siamtha dawn tih ZPM hruaitu Lalnghinglova Hmar chuan a sawi.
Thawhtannia ZPM office-ah inkhawmah an party adviser Lalnghinglova Hmar chuan, in sak buaipui chhung rei lutuk tih ziaawmna atan AMC Building Regulation 2007 leh Site Development Modification Regulations 2017 chu ennawnin a tul anga siamthat a ni dawn tih a sawi a. In sak buai chhung rei lutuk chu mipui harsatna tawh lian ber pakhat a nih avangin ZPM sawrkar AMC an siam a nih chuan in sak a awlsam tawh dawn tih a sawi a ni.
Tuna dan hman mekah Aizawl khawpui huamchhunga ran vulh phal loh chu ennawn a tul tih a sawi a. Veng hrang hrang local council-te nen inrawn tlangin vulh theihna hmun tur leh veng siamfel a ngai, tiin, hei hi an ngaipawimawh takzet tih a sawi.
Tourism department leh UD&PA department hmalakna in zan thum riah daih Aizawl khawpuia tourism programme an duang tih Tourism minister Lalnghinglova Hmar hian a sawi a. Hemi hmang hian Aizawl economy chawikan an tum a, an tih theih ngei pawh an ring tih a sawi.
Sakawrhmuittuai, Muthi, Durtlang North, Durtlang, Hangi Lunglen Tlang, Laipuitlang, Lammual, Khawhpawp, Ailawng & Reiek, Sailam, Sialsuk, Hmuifang chu tourist hipna turin an chei thar dawn a, sum pawh an dawng tawh fel tawh tih sawiin, “Khualzinte an hun tam zawk Aizawlah an cham theih chuan sum tam tak an thlauh dawn a, chu chu Aizawl mipui, a bikin sumdawngten an chhawr dawn. Sum lengvak a tam anga, kan zavaiin kan chhawr dawn a ni,” a ti.
2023 December 8 atanga chhiarin, ZPM sawrkar chuan ni 849 a hmang ta a, term khat – kum 5 chu ni 1826 ni ta se zaa 46.45 an hmang tawh a. Term kal mekah ni 977 a la awm a, June 9 hian term zahve an thleng dawn tih minister hian a sawi.
“Heng kum hnih chhung hian inzir chawp chungin, theihtawp kan chhuah a, duhthusam ni lo mah se Pathian zarah hmasawnna hmuh tur tam tak leh danglamna kan hmu tawh a ni. Sawrkar lai thawhpui thei tur AMC thlan a ngai a, Aizawl khawpui hian AMC tha zawk a mamawh a, Aizawl mipui hian AMC tha zawk kan phu a ni,” a ti.