National Highway 54 kawngpui laih mekah Serchhip district huamchhunga sawrkarin ram a lak fel tawh, dan anga zangnadawmna sum dawng tawh zingah in leh lo thiat duh lo lui an la awm avangin Serchhip district administration chuan Competent Authority for Land Acquisition (CALA) an nih angin dan tlawhchhanin hma an la dawn.
CALA leh district bawrhsap David Lalthantluanga chuan Nilaini khan Chhingchhip leh Chhiahtlanga NH54 laih mek a tlawh a. Compensation dawng tawh zingah mahni in la thiat duh lo te chungchang ngaihtuahin a hmunah a enfiah. Kumin July leh August khan magistrate-ten an inah ngei kalchilhin an in thiat tura thupek ‘eviction notice’ an lo pe tawh a. La thiat lote chu dan angin an chungah action lak a ni dawn tih a sawi a ni
Karthara mahni in la thiat lo te chu IPC Section 188 hmangin thubuai siamsak an ni dawn a, jail tan thlengin hrem theih an ni dawn tih district thuneitute hian an sawi a. Magistrate kaihhruaiin an in leh lo chu nawrchhiat sak an ni ang. Dan anga action lak kher a ngaih lohna turin district administration chuan Serchhip district-a khaw hrang hranga in thiat duh lo la awm te chu thiat vek turin a hriattir nawn a ni.
NH54 kawngpui laih mekah hian Serchhip district-a compensation dawng tawh zingah zaa 93 chuan an in an thiat tawh a. Mi tlemte chauh thiat lo an la awm a ni.
In thiat duh lo luite chungah dan lek dawn
