Serchhip district bawrhsap, an district-a Competent Authority for Land Acquisition (CALA) ni bawk David Lalthantluanga chuan National Highway-54 kawng laih zauhna atana compensation la tawh, an in la thiat lo te chu, 2023 August 23-a chhuahsan tura hriattirna (eviction notice) 2023 a tihchhuah hmangin thiat nghal turin a ti.
Section 3E(1) of The National Highway Act 1956 sawi angin, Serchhip district CALA hian ram neitute chu ni 60 chhunga chhuak turin lehkha in a hriattir a. Serchhip district chhunga NH-54 Aizawl-Tuipang kawng laih zauhna atana compensation la tawhte chu an in thiat turin kumin July 8 leh July 27 khan a lo hriattir nawn tawh bawk.
July 27 khan magistrate leh police-te chuan a hmunah kalin an enfiah a. Enfiah a nih lai thlenga in la thiat lo chu ni 10 chhunga thiat tura hriattir an ni. He ni 10 chhung hian an thiat ngei em, tih an khaw village council kaltlangin vil zui a ni a. NH Branch chuan phone call-in compensation latute chu an in an thiah leh thiah loh an ngaihven zui reng bawk.
Heti chunga sawrkar thupek zawm duh lo – in thiat duh lo leh chhuahsan duhlote chu Section 3E(2) of The National Highway Act 1956-in thuneihna a pek angin CALA hian hma a la dawn a. He thupek an hmuh atang hian an in la thiah loh chu thiat nghal tura hriattir an ni. Thupek zawm duh lo chu Section 188 of Indian Penal Code hmangin thubuai siamsak an ni dawn tih a sawi a ni.
In thiat turin hrilh nawn
