In vote dawtah in ration card leh ram an la dawn -Gandhi

In vote dawtah in ration card leh ram an la dawn -Gandhi
Congress hruaitu, Rahul Gandhi-a chuan Thawhlehni khan Election Commission leh BJP chu ‘vote ru turin’ an inkawp nia sawiin Bihar-a chengte chu vote an thlak theihna ruksak an ni tawh a, an ration card leh an ram pawh laksak an ni dawn tih a hrilh.
Gandhi-a hian Bihar assembly inthlan hnuhnung ber pawh kha ‘ruk’ tia sawiin engtik niah emaw thu dik a la lang dawn tih a sawi.
“Thu dik a lo lan hunah chuan Election Commission-a mite hian kan sorkarin an laka hma a la tih hi an theihnghilh dawn lo a ni,” tiin Lok Sabha-a leader of opposition chuan Bihar-a Voter Adhikar Yatra a neih mek ni thumna, Nalanda-a hun a hmannaah a sawi.
Bihar-a thalaite chuan vote ‘ruk’ chu an pawm thei dawn lo tih a sawi bawk.
“Kan dikna chanvo a nih avangin a thlen an phal dawn lo va, vawiin hian India-a mi retheite chiah hian kan vote chiah hi kan nei tawh a, i vote kha an laksak che chuan a dawt leh chu i ration card, i ram leh i engkim laksak che a ni mai,” tiin Gandhi-a chuan a sawi.
EC chuan ‘vote an ru ngei’ tih Gandhi-a chuan a sawi a. Congress-in an zir chiannaah Bangalore Central Lok Sabha bial chhunga assembly bial pakhatah chuan voter lem nuai khat vel a awm tih a sawi a, hei hi EC chuan chhang duh lovin a hnenah finfiahna (affidavit) an dil let zawk tih a sawi.
“EC hian machine-readable voters’ list leh videography kan dil min pe thei lo va, ‘vote an ru ngei’ a ni,” tiin Congress chief thin chuan a sawi.
“Affidavit min dil suh u, in (EC) data-ah khan a awm vek zawk… Bihar mipuite hian affidavit pe turin an lo dil dawn che u, Bihar mipuite hian vote ruk an phal dawn lo,” a ti.
Gandhi-a hian tun hnaia Bihar-a electoral roll Special Intensive Revision (SIR) neihah vote nei nuai 65 vel paih an ni tih sawiin hei hi phal lo turin mipuite a ngen.
“Vote ruk’ duh lohna avangin Bihar pum kal chhuak turin he yatra hi tan a ni,” a ti a, mipuiin an auhla siam, ‘vote chor, gaddi chhor’ tiin an chhang let.
Gandhi-a hian a rang thei ang bera hna nei lo tam lutuk tihtlem a tul tih a sawi bawk.
“Made in China’ hi titawpin ‘Made in India’ leh ‘Made in Bihar’ hi kan neih a ngai a. Hna nei lohna hi tihtawp a tul,” a ti.
A hmaa Bhagat Singh Chowk, Nawada-a hun a hmannaah hian Gandhi-a hian vote thlak theihna chanvo chu ram danpuiin mipuite a pek a ni a, hei hi Prime Minister Narendra Modi, Home Minister Amit Shah leh election commissioner-ten ‘an laksak’ niin a sawi.
“Hei hi danpuiin a pek che u a ni a, Modi, Shah leh election commissioner-te hian an laksak che u a. (RJD hruaitu) Tejashwi (Yadav), kei leh mi dang (Mahagathbandhan hruaitute) hi he hmunah hian lo dingin Bihar-ah hian vote khat pawh ruk phal a ni dawn lo,” a ti.
Gandhi-a hian EC-BJP tang dun chuan Haryana, Maharashtra leh Madhya Pradesh inthlan pawh ‘an ru’ niin a puh bawk.
Maharashtra-ah hian Lok Sabha leh assembly inthlan karah ‘mitdawihvaih hmangin’ voter vaibelchhe khat belh a ni tih Gandhi-a chuan a sawi.
“Tunah Bihar-ah hian tih dan thar hmangin ‘vote an ru’ leh a. In mithmuh ngeiah an ru a; mahse, ‘vote ruk’ hi kan phalsak dawn lo,” a ti.
Mipuite chu inring tura ngenin, “A hmasaah i voter card a bo ang a, i ration card-in zuiin i ram chu Adani leh Ambani hnenah hlan a ni zui ang,” a ti.
“He ram hi lo neitu, inhlawhfa, sumdawng tenau leh thalaite ta a ni a, mi hausa tawntaw tlem te, Adani leh Ambani te ta a ni lo,” a ti a. GST, pawisa tlang lian tihthih leh thil dang, dan hmanga tih nia lang tam tak pawh mi hausa tawntaw tlem hamthatna tur vek niin a sawi bawk.
Gandhi-a hian thu a sawi tan dawnah voters’ list atanga hming paih a ko chhuak hmasa a. Ani hi a insawi dan chuan Lok Sabha inthlanah khan polling agent a ni a, SIR neihah khan a hming paih a ni ta a ni.
Rashtriya Janata Dal hruaitu, Tejaswi Yadav-a pawhin Nawada-ah hian thu a sawi a, Lok Sabha inthlanpui neih leh hunah ‘Rahul Gandhi-a hi prime minister-ah kan siam dawn’ tiin a sawi.
Bihar Assembly-a leader of opposition ni mek hian SIR chungchangah EC chu beiin ‘vote ruk’ chu Bihar-ah a awm an phal dawn lo tih a sawi.
Gandhi-a’n SIR neiha thil dik lo au chhuahpui tura Voter Adhikar Yatra a kalpui mek ni thumna hi Wazirganj, Gaya atanga tanin Nawada a lut a. Sheikhpura kal pelin Nalanda an thleng leh a. Nilaini khan chawlin Ninganiah hian Nalanda atangin a chhunzawm leh ang.
Yatra hi nikuma Lok Sabha inthlan dawna Manipur atanga Mumbai thleng Bharat Jodo Nyay Yatra a neih ang kha niin ke leh lirtheiin an kal a ni.
Lakhisarai, Munger, Bhagalpur, Katihar, Purnea, Araria, Supaul, Madhubani, Darbhanga, Sitamarhi, East Champaran, West Champaran, Gopalganj, Siwan, Chhapra leh Ara a la tlawh dawn a ni.