Daily Newspaper

Inbiaknain rah tha a chhuah em?

7

Thenawm state Assam-in min kap a, a hnuah kan purchawkna ber kawngpui an dangchat zui a. Hripui len lai a ni a, hri kaite enkawlna damdawi leh a kaihhnawih (life saving equipments) leh ei bar thil bakah sumdawnna bungrua lo lut tur an dang vek a. Chuti chung chuan inbiak an duh angin niminah state pahnih aiawhte an inbia a. Ramri hrula boruak ralmuang a awm thuai tha tiin ramri chungchangah inremna tluantling a awm theih nan thu inchuh laite chu dawhkan kila sawiho nise tiin thuchhuah intawm an siam a.

He inbiaknaah hian boruak ralmuang awm thuai tha ti chung siin Assam lam hian ‘economic blackade’ an hlip duh chuang lova, hei hi Mizoram lam tan chuan ‘boruak ralmuang’ a ni ve thei lo a; inbiakna hian rah tha a chhuah lo niin a lang.

Thildanga inremsiamna neihte erawh hunin a hril tur a la ni chauh a. Assam sawrkar hian inremna thuthlung hi a bawhchhe lo a nih chuan Mizoram lam chuan a bawhchhe hauh lovang tih a lang chiang sa a; a chhan pawh, hun kal tawhah buaina siam hmasatu kan nih ngai miau loh avangin.

Inkahna a thlen hnuah, Assam chief minister-in, Myanmar atanga raltlante awmna tur hmun Mizoram a pek duh loh vanga Mizoram chu lungawi lo nia a sawi te, Assam-in Bawng humhalh a buaipui chu kristian state Mizoram hian a duh loh vang leh, Assam sorkarin ruihhloa sumdawnna an chhut chah avanga Mizorama ruihhlo hmanga sumdawngte leh ruihhloa inrawlh Mizo politician-te a tih thinur vang nia a sawi chungchang te pawh kha, Assam sawrkar hian a sawifiah a ngai ngeiin a rinawm. Khawvel hriatah min puh mualpho a, a diklohzia khawvel hrilhhriat leh hi kan tihtur niin a lang. Ruihhlo chungchangah phei chuan, ramria silai hmet puak kher lovin, ruihhlo donaah hian thawhho kan duh em em zawk ang tih a lang a. Heti zawnga inpuh hmingchhiat kher hi chu thil dik a ni thei lo. Raltlan, bawng leh ruihhlo chungchanga min puh hmingchhiatnate kha sawifiah ve tura kan phut a tha lo’ng maw le?

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy