Police station hrang hrangah landline telephone an neih ho hman tlak loh a tam a, officer -in -charge te mobile phone chu biakpawhna ber a nih laiin an awmna sawn thin an nih avangin inbiakpawhna lamah harsatna a thleng tam hle tih sawi a ni. Centre for Environment and Social Justice (CESJ) Mizoram hruaitute sawi danin, hmun kilkhawr zawka cheng harsatna tawk ten an hnaivai police station /out post phone number tarlana an biakpawh theih loh thu report an dawn fo avangin, Mizoram puma police station 54 awm biakpawh tumin ni engemawzat chhung an fiah a, tum khat mai ni lo, chhun leh tlai lamah te tum hnih thum biakpawh tuma an beihnaah police station 54-ah hian pahnih chiah lo chhangtu awmin an be pawp thei tih an sawi.
Police station biakpawh theihna atan station officer in-charge (OC) te personal phone number hman a ni tlangpui nia sawiin, transfer an nihin kha station biakpawh theihna number an tarlan kha update a ni ngai loa, chu chu mipui harsatna thlentu a ni tih an sawi.
“Mimal cell phone/ personal contact number, police station biakpawhna atana hman hi thil kawngkal a ni loa. Official website-a phone number tarlana an phone theih loh hi police-ten mawhphurhna (responsibility) an lak ngam loh vangin phone no. dik an tarlang ngam lo em ni, tih leh, hei hian police-te ah hmelhriat nei tha leh tha lo inkar a tih zau phah em, tih zawhna a a awm,” CESJ general secretary VL Thlamuanpuia chuan a ti.
Tunhnaiah khawtlang /veng duty-ten misual nia an ngaih leh rinhlelh an man thinte chunga an chet dan avangin mipui thinurna cho chhuak tualthihna a thleng tih a sawi a. Hei hi tunhma pawha thleng fo tawh a ni, tiin, dan kenkawh kawngah sawrkar ve reng ruang, tlawmngai pawla a innghah zia a tichiang a, dan kenkawh kawnga an hlawhchham tih a lantir nghal tih CESJ hruaitu hian a sawi.
Village Defense Party (VDP) bakah community based organization (CBO) ten dan kal pelin hma an la thin a. The Mizoram Police Act 2011 hnuaia inkaihhruaina dan siam leh kalpui dan duansa pakhat mah zawm a hlawh lo chu pawi an tih thu a sawi bawk.
Heng thil hi siamthat a nih theihna atan February 3 khan chief secretary hnenah CESJ Mizoram chuan lehkha an thehlut tih a sawi a. An lehkha thehluh hi tihhlawhtlin a nih ngei theihnan Mizoram Home department an phut tih a sawi a ni.
Minister pahnih – Home changtu Pu K Sapdanga leh Information & Communication Technology changtu Dr Vanlathlana ten harsatna leh manganna tawkten police an biakpawh zung zung theihnan hma an lak thuai an beisei tih CESJ general secretary hian a sawi.
Chief secretary hnena CESJ thu thlen chu:
8 Mizoram sawrkar website-a emergency service /police station contact no. tarchhuah zingah function lo tam tak a awm a. Heng hi mipui tana biakpawh theiha siamtha thuai turin
8 The Mizoram Police Act hnuaiah heng, ‘Chapter V – role, functions, duties and responsibilities of the Police Mizoram’ hian an mawhphurhna leh tih tur chiang zawka an hriat theihnan nasa zawka trainning pe tura hma la turin
8 Aizawl khawpui bakah district/ sub-divisonal hrang hrangah tlawmngai pawl hmalakna h sawrkar innghat ringawt tawh loa, sual dona kawnga beihpui thlak a, uar zawka police patrolling kalpui turin
8 Dan kengkawhtu zingah rui chunga hna thawk thin leh mipui harsatna leh manganna chinfel sak aia an rilru natna belhchhahsaktu leh ngaihsak tawklo awm thinah, action lak thuai a nih theihnan state & district level ‘Police Complaint Authority’ thuamchak leh tihchangtlun nise, zau zawka mipui hriat tura pholan nise.
8 The Mizoram Police Act 2011 hnuaia Chapter-VI, “Policing in Rural Areas and Village Police System” in inkaihhruaina dan a siam leh kalpui dan tur a duana dan awmsa pakhatmah zawm a hlawh loa. VDP-te danin a sawi anga SP-a registration ti lo leh training dawng si lo an awm. Hetiang dan awmsa Home department-in a kengkawh lo a nih chuan VDP/CBO duty hi thiah mai nise, an aiah hlawh nei police-ten duty hna nasa zawkin thawk se.
Inbiakpawhna lamah police station thuamtha turin sawrkar hotute ngen
