Kerala-a nupa tuak khat chuan fa an hring a, record an siam. A pakhat zawk chu transgender, hmeichia mipa a insiam a ni a, hormone therapy leh surgery hmanga insiam danglam a ni. An fa hrin hi zai chhuah a ni a, naute hi mipa nge hmeichhia tih erawh an puang lo. An record siam chu India-a transgernder nupa zinga fa hring hmasa ber an ni.
Zahad chu a pian danah chuan hmeichhia a ni a, mahse, mipaah a insiam ta a, ani hian nupuiah Ziya a nei a, an nupa hian falak (adopt) an tum a, mahse, thulh lehin hormone therapy leh sugery te hmanga insiam danglamin, nau hi an pai thei ta a, an fa hrin hun tur chu March ni 4 a ni a, mahse, a nau paitu zawka tang Zahad chu a blood sugar a san avangin naute hi a neih hun hmain an zai chhuak ta a ni.
Ziya chuan Instagram-ah an naute kut thlalak post-in, “Zing dar 9:37-ah kan duhthusam a thleng ta, kg 2.920 a rit chuan khawvel boruak a hip ve tan ta. Kan kianga nghet taka ding ve tlat te kha, lawmthu kan hrilh mawlh mawlh che u,” a ti.
Zahad leh Ziya te hi kum thum kaltaa intawng kha an ni a, chutihlai chuan Zahad hian a hnute a paih tir tawh a, hormone therapay pawh a la nual tawh. Mahse, a uterus leh a naupai theihna taksa peng dang te a la paih lo hlauh a, chuvanga nau pai leh theih a ni ta chauh zawk a ni.
Kerala state health minister Veena George chuan Ziya hi phone-ah biain an nupain duhsakna a hlan a, minister hian Kozhikode Government Medical College Hospital hnuaia Institute of Maternal and Child Health-a an superintendent chu Zahad leh naute enkawlna zawng zawng chu a thlawn veka tih sak turin a hriattir nghal bawk a ni.
Zahad enkawltu Dr. Jyoti Ramesh Chandran chuan Zahad leh naute chu ni 5 vel chu damdawi inah an awm phawt a ngai niin a sawi a, naute nu hian a hnute a lo paih hman tawh avangin naute hi hnute siamchawp hnektir a ni.